6‏/4‏/2008

أصحى يا شلبي !

كان عمدة القرية يجلس مع أقرانه في فناء منزله متبختراًً، فقد أحضر طبق استقبال مؤخراً هو الأول من نوعه في تلك القرية !!

وكان العمدة يتابع في انتشاء نظرات الدهشة والذهول على وجوه الحاضرين أثناء مشاهدتهم لتلك الأعجوبة التي تعرض قنوات لا حصر لها من أنحاء العالم !!

خصوصاً (شلبي) شيخ الغفر الذي كاد لعابه أن يسيل أثناء مشاهدته لقنوات (الفيديو كليب) والتي يعتبرها في نظره قنوات (إباحية) قليلة الحياء!!

كان العمدة يقلب بين القنوات في فخر منتظراً صيحات من معه ترجوه لإبقاء قناة بعينها لمتابعة ما بها من مسلسل أو أغنية أو فيلم أجنبي ضرب (أكشن) أو حتى مباريات المصارعة الحرة التي يعشقها جميع القرويين قاطبة !

وأثناء البحث عن قناة مسلية وقف العمدة وأعلن أنه سيذهب لبيت الراحة وسيعود خلال خمس دقائق لا أكثر !!

وعند عودته وجد الحضور يتابعون أحد البرامج والتي يظهر فيها رجل وقور يتكلم بهدوء عن أحد فروع المنطق !! ودهش العمدة كثيراً لمتابعة الغفر وشيخهم لذلك البرنامج التافه , فجلس وأمسك جهاز التحكم ليغير القناة ..

إلا أن (شلبي) شيخ الغفر سأله فجأة :

  • ألا (جولي )يا جناب العمدة .. يطلع أيه (التسلسل المنطجي) ده ؟
  • بتقول أيه يا ياض يا شلبي ؟؟
  • معلش جنابك .. أنا عارف أنك فاهم كل حاجة !! بس أحنا مش فاهمين حاجة من الكلام ده خالص .. وأنت راجل دماغك كبيرة وفاهم كل كبيرة وصغيرة .. اللهم لا حسد يعني يا عمدة !!!


شعر العمدة بالزهو من كلام شلبي !! ثم شعر بالقلق بعدها !!

فهو لا يعرف ماذا تعني كلمة (التسلسل المنطقي) هذه .. وفي نفس الوقت لا يريد أن يشعر بالحرج أمام قومه بسبب جهله لشيء لم يسمع عنه بالمرة !!

  • (التسلسل المنطجي) أيه ياض يا شلبي ؟؟ أنت جبت الكلام ده منين ؟؟ أنت بتذاكر من ورانا ياض واللا أيه ؟؟
  • لا والله جنابك .. دي كانت في البرنامج اللي كان شغال من شوية !! بس أحنا (مش فاهمين) يعني أيه !! عشان كدة حبيت أسأل الراجل (الكبارة) بتاعنا .. أنت يا (عمدة) ..


أفتل العمدة شاربه الضخم بأصبعيه في بطء كدليل على التفكير العميق ، ثم سأل شلبي :

  • بس أنت متأكد ياض يا شلبي إنه كان بيتكلم عن (التسلسل المنطجي) ؟؟
  • أيوة يا عمدة .. والختمة الشريفة كمان !!
  • غريبة .. أصل (التسلسل المنطجي) ده موضوع صعب وكبير .. حتفهمه أزاي أنت والغفر بتوعك دول ؟؟
  • مش مهم يا عمدة .. بس العلم بالشيء ولا الجهل بيه !!
  • خلاص ياض يا شلبي .. أنا بكرة رايح البندر الكبير .. عندي مشوار مهم في مصر .. حخلصه وأطلع على المحطة وأسأل المذيع هو كان بيتكلم عن (التسلسل المنطجي) فعلا ؟
  • يعني حتطلع في (التلافزيون) يا عمدة ؟؟ يا ألف نهار أبيض يا ولاد !!
  • !!!!

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ


في اليوم التالي ذهب العمدة إلى مبنى إدارة القناة التي عرضت ذلك البرنامج ، وسأل عن اسم الشخص التي قام بتقديم حلقة أمس والخاصة بالتسلسل المنطقي !!

فأعطوه بيانات مقدم البرنامج وعنوان مكتبه في الجامعة !!

وذهب العمدة بالفعل إلى الرجل في مكتبه .. وبعد أن قاما بمراسم التعارف باغته العمدة فجأة :

  • معلش يا (ضاكتور) .. أنا ما فهمتش أيه هو (التسلسل المنطجي) ده !! ممكن تشرحه تاني ؟؟


نظر له الدكتور في ذهول .. ودهش لاهتمامه وسؤاله عن التسلسل المنطقي !! واحتار في شرحه له بطريقة يفهمها ويستوعبها !! فابتسم له وقال في بساطة :

  • شوف يا عم الحاج .. التسلسل المنطقي عبارة عن استنتاجات مستخلصة من مدخلات ومعطيات منطقية ضئلية للغاية !!
  • يعني أيه يا (ضاكترة) ؟؟ مش فاهم برضه .. علامي مش زي علامك يا بيه .. أعذرني برضة !!

نظر له الرجل في هدوء , ثم ابتسم وقال :

  • طب أنا حسألك شوية أسئلة .. أوكي ؟
  • اتفضل يا (ضاكتور) .. أسأل زي ما أنت عايز .
  • أنت عندك كلب يا حاج ؟؟
  • نعم يا بيه ؟؟ تقصد أيه بالسؤال ده ؟؟
  • معلش يا حاج .. جاوبني على السؤال ده !!
  • غريبة والله .. أيوة يا (ضاكتور) .. أنا عندي كلب فعلاً !!
  • طالما عندك كلب .. يبقى أكيد الكلب ده بيحرس حاجة معينة ، أرض مثلاً !
  • تمام .. فعلاً أنا عندي أرض كبيرة ..
  • وطالما عندك أرض كبيرة .. يبقى أكيد الأرض دي فيها بيت كبير برضه ..
  • تمام يا (ضاكتور) .. أنا فعلاً ساكن في أكبر بيت في البلد (كلتها) !!
  • طالما أنت ساكن في أكبر بيت في البلد .. يبقى أكيد أنت أكبر (راس) في البلد كلها .. يبقى أنت العمدة .
  • والله (براوة) عليك يا (ضاكتور) .. عرفت أني العمدة من غير ما أقولك ..
  • طالما أنت العمدة .. يبقى أكيد والدك (الله يرحمه) كان عمدة برضة ..
  • ما شاء الله .. عرفت إن أبويا عمدة ؟؟ ومات كمان ؟؟ أيه (الحلاوة) دي ؟؟
  • وبما إن والدك كان العمدة .. يبقى أكيد الحاجة والدتك ست شريفة وجميلة ومن عيلة كبيرة كمان ..
  • أنت (مخاوي) جن واللا أنت من أهل الخطوة يا (ضاكتور) ؟؟ عرفت الحاجات دي كلها إزاي ؟؟
  • عشان ده يا (عمدة) اسمه علم .. وببساطة كدة هو ده (التسلسل المنطقي) .. يخليك تعرف حاجات كتيرة من خلال معلومات صغيرة .
  • ياااااه .. أنا مش عارف أشكرك إزاي يا (ضاكتور) .. فعلا يا أولاد العلم نور ..
  • تحت أمرك يا عمدة .. شرفتني بزيارتك .

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

عاد العمدة إلى قريته .. وأقام الجلسة الليلة المعتادة في بيته مع شيخ الغفر وأتباعه ليلتفوا حول التلفاز الموصل بطبق الاستقبال ..

فجأة تذكر (شلبي) شيئاً .. فسأل العمدة :

  • صحيح يا عمدة .. عرفت أيه هو (المسلسل المنطجي) ده ؟؟

كان العمدة ينتظر سؤاله في لهفة .. فاعتدل في جلسته وقال في ترفع :

  • اسمه (التسلسل المنطقي) يا جاهل ..
  • أيوة .. هو ده يا عمدة !! يعني أيه (بجى) ؟؟
  • حقولك يا ياض يا (شلبي) .. بس الأول حسألك كام سؤال كدة .
  • أتفضل يا عمدة ..
  • عندك كلب ياض يا (شلبي) ؟؟
  • لا يا عمدة .

اعتدل العمدة في جلسته أكثر .. وظهرت عليه ملامح الحكمة والعلم وهو يقول في سرعة :

  • إذن أمك امرأة ( ######) .

(ما بين القوسين لفظ عامي بذئ جداً جداً جداً .. ويقابله في الفصحى لفظ "مومس" !!!!!)


(تمت)

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ


بعيداً عن مجريات أحداث القصة السابقة ..

لا أدري لماذا كلما سمعت كلمة (حكومة) .. يأتي في رأسي شخص (العمدة) في القصة السابقة ؟؟


وأيضاً ..

كلما سمعت كلمة (مواطنين) أو (شعب) .. يأتي في رأسي شخص (شلبي) شيخ الغفر في القصة السابقة .. وبحذافيره !!


هذا الترابط الغريب في ذهني فشل معه أسلوب (التسلسل المنطقي) في تفسيره !!


thinkingthinkingthinkingthinkingthinkingthinkingthinkingthinkingthinking


فهل يوجد بينكم (ضاكتور) متخصص وليس (عمدة) كي يفسر لي ؟؟
نشر الرسالة
exclaimideasurprisewaitinghypnotizedideaon the phoneraised eyebrow

هناك 11 تعليقًا:

محمود يقول...

شوف يا استاذ وائل مع انك لسة حراجنى فى البوفية دلوقتى الا انى هجوبك على سؤلك
الموضوع ببساطة ان احنا فعلا زى شلبى الغفير (احنا كشعب ) جهلاء بالغصب والحكومة بتاعتنا جهلاء بالفطرة لذلك هو ده التسلسل المنطقى للربط بين قصتك والحقيقة ولما بيحوا يعملوا حاجة معندهمش ابتكار زى معرفوها ينفذوها بالظبط زى ما العمدة سأل الغفير عندك كلب ولا لأ طبعا الجواب كان لأ وهو عارف الاجابة لما يكون الجواب نعم
بس عمتا احيك على الفكرة بس مكنش لازم يعنى الالفاظ البذيئة دى

عرين الغضب يقول...

محمود بيه أبو ملك :

مع أني أحرجتك في البوفيه من شوية صغننة !! إلا أن احترامي لفهمك ارتفع للغاية ..

فعلاً تحليلك للقصة دي كان رائع .. يمكن دي أكتر مرة عجبني ردك على موضوع عندي !
بس ملحوظة سريعة :
العمدة كان فاكر نفسه فاهم (التسلسل المنطقي) !!
بس لما كانت المعطيات غير متوقعة .. ألغى التسلسل تماماً وطلع بنتيجة عكسية !!
في حالة العمدة التسلسل بدأ بـ :
بكلب ..
ثم :
نعم ..
وانتهى بحسن النسب للعمدة !!

أما في حالة شلبي ، التسلسل بدأ بـ :
كلب ..
ثم لا ..
ثم تخطى العمدة الاستدلات والمحاور الفرعية للتسلسل .. وانتهى بنهاية مأسوية لشرف (أم) شلبي !!

(يخرب بيت دماغي !! أنا حللت التسلسل المنطقي في القصة بأسلوب التسلسل المنطقي نفسه ؟؟؟!!
ربنا يستر على حبة العقل اللي فاضلين لي )

كمان فيه واحد في القصة دي تعمدت ذكره بالصورة اللائقة به ..
الدكتور .
تعرف مين هو الدكتور يا محمود ؟؟


أشكرك على الرد يا (ضاكتور) ..
وعلى فكرة :
أنا قتلت الموضوع بحثاً عن البذاءات في هذا الموضوع .. وكانت أقصى كلمتين بذاءة هي : (تلافزيون) و (حكومة) ..

أم لعلك تقصد مصطلح (شيخ الغفر) ؟؟
هل أدرجوه ضمن البذاءات يا محمود ؟؟

بالنبسة لموضوع إحراجي لك في البوفيه ..

يشرفك يا عزيزي أن تكون أول رجل أعتذر له هن في (عرين الغضب) ..
تقبل اعتذاري يا ابو ملك ..
بس لما أكون سرحان .. ياريت ما تتكلمش معايا خالص ..

في انتظار باقي التفسير منك ومن الآخرين !!

محمود يقول...

لازم يعنى ابو ملك دى كده الناس تفتكرنى عندى 50 سنة ولاحاجة
عمتا عادى مفيش حاجة حصلت منا عارفك
يا هتلر
اه لفكرة ملك عندها النهاردة بالظبط 6 شهور
اعزمنى على فطيرة بالقشطة والعسل بقى
بطل بخل

عرين الغضب يقول...

كنت حرد عليك ..
بس فكرت شوية ولاقيت أني مش لازم أدخل في مواضيع (أرتوازية المحاور) و(هلامية المعنى) و(فراغية المحتوى)!!
عشان كدة قررت السكوت على ردك السابق !!

يا راجل بقولك فكر في الدكتور وركز في كلامه وطريقته .. تقولي فطيرة بالقشطة والعسل ؟؟؟

ده غلب أيه يا ربي ده ؟؟

بعدين يعني أنت فاكر نفسك (عماد عبد الحليم) ؟؟ فيها أيه يعني لما الناس يعرفوا أنك متجوز واللا مخلف ؟؟

يا عم ركز معايا في (شلبي)..

أرجوك يا أبو نوال ..
ركز عشان خاطري !

maha zein يقول...

سم ودم كده
مبروك يا ابو ملك تمام ملك 6 شهور


بقولك يا الي اسمك شلبي انت... قصدي عرين الغضب انا هفضل اتمة كده معاك لاني صراحة مش راضية عنك
معرفش ليه متغاظة منك
اصلك صراحة بقيت رخم
معلش اعذرني لكنى صريحة بشدة
وبعدين انا قلتلك قبل كده اني بزهق
ومش هعلق
ومش هجاوب
ومش هقول حاجة
وهرخم
وكله من ده
لو عاوزني ارضى
ممكن تصالحنى بفطيرة بالقشطة
سعتها ممكن افكر
ممكن

عرين الغضب يقول...

مها زين :

وحتى لو كنت أنا (إله الرخامة) .. كنت حكون مهتم جداًً أعرف رأيك في الموضوع نفسه .. مش تعليقك على تعليق في الموضوع ..

وعلى فكرة :
أنا كمان بموت في الصراحة !

محمود يقول...

ولما انت مش عايز الفطيرة كنت بدور على نمرة المحل امبارح لية
وائل بما انى الضاكتور :
اسمحلى اقولك انك عندك شيزوفيرينيا
وبعدين يا اخويا اهه المحلات كلها قفلت يا فقرى

مها زين : الله يبارك فيكى وعقبالك كده
بالنسبة للفطيرة دى عندى انا هبعتهالك بال DHL
وسيبك من بتاع ارتوازية المحاور ده دا خلاص العمده كل دماغة

عرين الغضب يقول...

مفيش فايدة فيك يا شلبي !

نام أحسن !


(فلينطلق الغضب من عرينه)

غير معرف يقول...

مبروك يامحمود لملك وعقبال السنة الاولى وكل سنة وهى منورة حياتك ..
سورى ياوائل التحية وجبت لمحمود باشا ...
بالنسبة للبوست فا احنا كلنا شلبى شئنا ام ابينا .. ربنا يصلح الحال .. وحسبنا الله !
ايار

غير معرف يقول...

يا استاذ يا مهذب قال النبي صلى الله عليه وسلم: (ليس المسلم بالسباب ولا باللعان) الصراحة مدونة فارغة وهذا رأي وليس سب الأولى أن توجيه ملكة الكتابة عندك للأفيد وليس تعرية الناس وتوضيح من ابن كلب ومن ابن قط،،، سلام

عرين الغضب يقول...

الأستاذ المهذب / غير معرف ..
من الجميل أن تعبر عن رأيك في تعليقك عندي ، وعندما قلت رأيك "بصراحة" بأن مدونتي (فارغة) فهذا شيء يخصك أنت !!
ولكنها تعجبني أنا ، وإلا لما نشرت موضوع واحد من تلك المواضيع !!
لاحظ أني لم أتقاضى أجر منك لدخولك عندي ، ولم أرغمك على قراءة المواضيع التي أكتبها كيفما يحلو إلي !
إذن أنت حر فيما تقرأه !!
وانا حر فيما أكتبه !!

أما بالنسبة للموضوع الذي أثار حنقك وحفيظتك والذي أخمن بأنه موضوع اسمه (أولاد الكلب) .. فهذا انطباعي عنهم .. ولازال انبطاعي عنهم !!
لا ولن يتغير تأثراً لرغبة أحد !


بالمناسبة :
حتى الآن لم أقم بكتابة موضوع اسمه (أولاد القط) .. ولا أظن بأني سأفعل ذلك !

دعني أشكرك مرتين لإبداءك نقداً على كل حال !

تقبل تحياتي !