20‏/4‏/2008

واحد تاني .. مش أنا يا عمو!!



عمو محمد ..

بابا حسني ..

أزيك ؟

قبل ما ابدأ كلامي مع صورتك .. عايز أوضح حاجة الأول :

أنا أمي ربتني كويس .. وعلمتني احترم الكبير والصغير !! وأنت – بالصلاة على النبي – أكبر راس في البلد .. غير أنك أكبر مني في السن يجي تلات مرات .. يعني حتكلم معاك بكل أدب واحترام على قد ما أقدر ..

شوف يا عمو :

أنا اسمي وائل ، عندي 28 سنة !! شاب غلبان أوي أوي ، ومش بحب اتكلم في السياسة خالص .. ماشي جنب الحيط زي ما بيقول المثل .. تحديداً أنا كافي خيري شري !

في الأول كانت أحوال البلد ماتهمنيش .. إنشالله تولع مصر كلها !! 

أنا مالي يا ريس .. خليني في حالي أحسن .. هو أنا يعني حعمل أيه وسط العالم دي كلها ..

بعدين يا عمو دخلت على مرحلة عمرية غريبة .. الدكاترة سموها (مرحلة المراهقة) !! من ساعتها بدأت عيني تتفتح شوية بشوية على حاجات كتير..

منها مصر يا عمو ..

بدأت أحس بمعنى مصر جوايا يا عمو ..

عرفت إن حب مصر أني مش أقول (بلادي بلادي .. لكي حبي وفؤادي) .. ولا حتى أقول: (تحيا جمهورية مصر العربية) وأنا واقف تحت العلم الجربان بتاعنا ..

لا يا عمو .. الموضوع أكبر من كدة بكتير ..

مصر ؟؟

أيه هي مصر ؟

مصر مش مجرد أربع حيطان هما أوضتي .. ولا مجرد شوراع مدغدغة وطافحة فيها المجاري .. ولا مجرد ناس غلابة ريحة عرقهم طالعة من تحت باطهم وهم واقفين في طوابير العيش بمنتهى الصبر ..

برضه مصر مش هي البلد اللي بتيجي في التليفزيون : شرم الشيخ والبحر اللي لونه أخضر وأزرق ، والرملة صفرا زي الدهب وناعمة ، ونسوان عريانة بياخدوا حمام شمس !! ولا هي البلد اللي الناس فيها بيتغدوا بالكافيار ويتعشوا جاتوة ويدخنوا سيجار ساعة العصاري !!

مصر مش الحكومة وبس يا عمو ..

مصر مش لسان وسخ لضابط أيده طرشة !

مصر مش موظف حكومة كسلان من بتوع (فوت علينا بكرة) !

مصر مش مجرد مؤيدين ومرشحين الحزب الوطني الحاكم !

عشان مصر يا عمو هي المصريين !

الناس الغلابة البسطاء .. اللي كل همهم أنهم ياكلوا ويناموا وبس ..

أحنا مصر يا عمو مش أنتم ..

أحنا المصريين.. اللي بنحب مصر بجد وبنخاف عليها ..

وأنتم (المعرضين) يا عمو ..

أيوة ..

معرضين مصر للضياع الكامل !

يمكن بسببك أنت .. أو الناس اللي معاك .. مش عارف بالضبط ، بس عارف إننا بالطريقة دي حنضيع بجد يا عمو !

بيقولوا إننا بقينا خمسة وسبعين مليون واحد وواحدة ..

مصر كبرت يا عمو .. مش كدة ؟

بقينا خمسة وسبعين مليون بق (فم) مفتوح عشان ياكل .. وعشان يعيش !

نص الناس دي ممكن ترضى برغيف بلدي (مفأفأ ) من أبو شلن ، مع طعمية بزيت مزنخ وحتة طرشي .. وخلاص على كدة ، الحياة فل وأخر (منجهه) ..

أهم حاجة عندنا هو : رغيف العيش !

مش مهم مية الحنفية فيها ريحة مجاري ، أو بتجيب فشل كلوي !

ولا مهم إن اللحمة غالية .. وانضربنا على قفانا وأكلنا لحم حمير وكلاب ميتة !

حتى حديد التسليح .. سعره بقى خزعبلي شويتين .. لدرجة إن فيه ناس بتبني بيوتها بأسياخ حديد بلاستيك !

ولا الفراخ اللي جالها أنفلونزا .. بس برضة حناكلها يعني حناكلها !

الخضار بقى مسرطن .. والفاكهة مرشوشة ومالهاش طعم .. تفتكر حنبطل ناكلها ؟ ده أحنا ناكل أبوها .. هي حتفرق معانا يا راجل ؟

وربنا يا عم دة أنت معاك ناس حتاكل الزلط وهي ساكتة .. بس أديها رغيف عيش تغمس بيه الزلط !


طب أنت عارف (يا أبو جيمي) أيه مشكلتك معانا ؟

مشكلتك إننا مش عارفين نعرفك إن كنا بنحبك أو بنكرهك !!

ولو كنا بنكرهك ، مش عارفين بنكرهك لشخصك ولا لمنصبك !!

بعدين الإعلام مركز أوي عليك يا عمي ..

كل ما أمسك جرنان أو أتفرج على الأخبار في القنوات بتاعتنا ألاقي دايماً :

  • الرئيس يلقي كلمته بمناسبة .....
  • الرئيس يستقبل وفد المندوب ...
  • الرئيس عاد سالماً من رحلة مكوكية استعرض فيها ..
  • الرئيس يشدد على حقوق المواطنين في الحصول على رغيف عيش نظيف ..
  • الرئيس ينصح حركتي حماس وفتح بضبط النفس ....
  • حرم الرئيس تفتتح المرحلة الثانية لتطوير عشوائيات زينهم ....
  • نجل الرئيس يلقي كلمته أمام المؤتمر السنوي للحزب الوطني الديمقراطـــ.........

هو مفيش غيركم في البلد واللا أيه يا عمو ؟؟

خلاص يا عم عارفين أنك مقطع نفسك شغل طول اليوم .. سفر ، ولقاءات ، وتعديل دستور ، اجتماعات مع الوزراء ...

لدرجة أني طول عمري بتخيلك إنك مش بتدخل الحمام تعمل زي الناس (اللي هو إحنا يعني) .. ولا حتى بتاكل وبتشرب زينا .. ولا بتصلي لربنا .. أو حتى بتكون شقي شوية يوم الخميس بعد ما العيال يناموا !!

معزول عننا أوي يا عمو ..

كأنك بتحكم بلد أنت مش عايش فيها أساساً ..

كان نفسنا نشوفك بتتكلم معانا بكل بساطة ..

  • من غير : كلمة أيها الشعب ، أو أيها المواطنون !! يا عم خلي البساط أحمدي .. ِقول يا مصريين وأخلص !
  • من غير : كلام معلب في ورق بتقرا فيه ، كتبه واحد غيرك .. وأنت قاعد بتقراه وخلاص !!
  • من غير : ترتيبات واتفاقات وحراسة وقرف ، يا عم تعالى على غفلة شوف أيه اللي بيحصل من وراك يا عم الحج !

وعلى فكرة بقى .. من الأخر كدة من غير لف ولا دوران يا عمنا :

مصر اللي سعادتك بتمشي فيها وعايش فيها ، غير مصر اللي أحنا عايشين فيها وطافحين الكوتة فيها ..

سعادتك بتمشي في شوارع كلها فاضية .. الإشارات خضرا .. أسفلت ناعم وحنين .. ولا فيه مطبات ولا زفت أرزق .. حواليك في كل حتة ظباط كتير ، بس ولا واحد فيهم فكر أنه يقول لك : بطاقتك يا حلاوة !!

أما لو رحت تزور أي مكان في مصر ..

فجأة نلاقي :

شجر على الجنبين .. عمدان النور في كل حتة .. الأرض نضيفة ومرشوشة .. الناس لابسة جديد والغريب أنهم كلهم بيضحكوا ..

ده أيه الاستهبال ده يا عمي ..

بعدين هي مصر اللي أنت تعرفها ، هي برضه مصر اللي أحنا عايشين فيها ؟؟!

  • أنت ماشي في شوراع فاضية .. وأحنا في الشوارع التانية الجانبية طالع دين اللي جابونا في عز الشمس عشان جنابك تعدي في سكينة وأمان !! ما تركب طيارة وقصّر في الدور يا ريس ..
  • اعتقد أنه المية ولا النور قطعوا البيت عندك .. أو حتى المجاري طفحت قدام بيتكم .. أو فاتورة التليفون جت غالية عشان المحروس أبنك بيتكلم كتير .. واللا تقف في طابور مالهوش أِخر عشان تقضي أي مصلحة في أم البلد دي .. وعن تجربة أحب اقولك : يمكن أجمل حاجة في أن الواحد يكون رئيس جمهورية هو أنه عمره ما حيقف في طابور أبداً .. أنا ساذج أوي يا عمو ، صح ؟؟
  • كل حتى في البلد ليك صورة .. وهو حد قال أنه نسي شكلك يا عم الحج ؟؟ بعدين أزاي شكلك في الصور زي ما يكون لسة عندك تمانية وتلاين سنة ؟؟ أيه يا عم الحج ؟؟ ولا حتى شعرة بيضة ؟؟

وعايز أعترف لك بحاجة عشان أخلص ضميري من ناحيتك :

بصراحة أنا قبل كدة قلت عليك كام نكتة للعيال أصحابي .. منهم حوالي أربع أو خمس نكت (أبيحة) شوية ..

بس الغريبة يا عمي أني عمري ما استحملت أن حد أجنبي يقول كلمة وحشة في حقك .. وبزعل أوي أوي أوي لو حد شتم فيك يا عمي ..

في الأخر برضه انت أبن بلدي .. وراجل طيب مش شرير زي الحكام ولاد الكلب الجربانيين بتوع الدول العربية الشقيقة ..

على الأقل أنت حكيم وفاهم في شئون الدول الأخرى ، وبتحاول تنصح الفلسطينين .. وتهدي بتوع سوريا ولبنان ..

بس يا عمو بصراحة كدة يعني :

يلعن أبو حماس على أم فتح .. خليك جوة يا عم .. مالك أنت ومال برة .. حتى لو ولعوا في بعض كلهم .. أنت مالك ..

خليك فينا أحنا ..

عندنا عشوائيات ..

عندنا ناس تحت خط الفقر ..

في ناس في السجون محدش عارف عنها حاجة ..

عندنا وزراء ولاد أربعة وسبعين كلب مش فاهمين حاجة في أي حاجة ..

عندنا محافظين ولا ليهم أي لازمة ..حتى شكلهم جرابيع وعرر وحاجة تكسف يعني ..


عايزين نكبر بقى يا عمو ..

عايزين نعدي ..

عايزين ننضف من الوساخة اللي أحنا فيها ..

وساخة سياسية ، ووساخة اقتصادية ، ووساخة تنموية ، ووساخة حضارية ، ووساخة اجتماعية !


أنا عارف إن المصريين شعب دماغه ناشفة ..

بس والله دول ناس زي العسل ..

أقل حاجة تزعلهم ..

وأبسط حاجة تفرحهم زي العيال الصغيرة ..


أنزل يا عمي من برجك العالي ..

أمشي وسطنا ..

أعرف مشاكلنا ..

كل من العيش بتاعنا ..

وبلع بالمية بتاعتنا ..

حبنا بجد يا ريس .. عشان نحبك ..

خلينا نفرح لما نشوفك في التلفيزيون .. وفي الجرايد .. وفي أحلامنا ..

ساعتها حنقول كفاية يا بتوع حركة كفاية ، ده الراجل بقى حبيبنا ..

ونطنش كلام الناس بتوع (الإخوان المسلمين) أو الجماعة المحظورة .. ونقولهم : (بس يا وحشين .. الراجل مراعي ربنا فينا) ..

ولما رئيس أمريكا يجعجع لنا عن الديمقراطية السليمة .. سيبنا أحنا نرد عليه ونقوله : (بس يا شاطر .. روح شوف مراتك فين الأول) !

بس لو تنزل يا ريس ..

يا عم أنزل بقى ..

وحياة جمال وعلاء يا شيخ أنزل ..


وكل سنة وأنت طيب يا سيدي .. بمناسبة عيد ميلادك التمانين ..


مرة تانية أحب أفكرك أني مش بتاع سياسة ..

حتى بص كدة :


إن كان على القلب .. مالوش غيرك

إن كان على الحب .. مفيش غيرك

ده جناحي مرفرف في سماكي

والقلب أتربى على خيرك

بلـــــــــــــــدي .. بلدي يا بلدي

بلـــــــــــــــدي .. بلدي يا بلدي


يا ترى حتنزل يا ريس ؟؟


thinkingnerdnerdmrgreen

هناك 7 تعليقات:

wael يقول...

طبعاً يشرفني أني أكون أول واحد يرد عليك يا عم عرين الغضب أنت !!

بس المشكلة أني مش عارف أقول لك أيه أبو الكباتن !!

يابني دول ناس كفرة .. أبعد عنهم ..
أكتب في الرومانسي .. أكتب في الشعر .. أكتب في الفلسفة ..
أبعد عن السياسة أبوس أيدك ..
يابني دول عالم ولاد كلب .. أنا عارفهم كويس!!
بعدين يابن الحلال لو قبضوا عليك حياخدوني معاك ..

انا عندي فكرة بوست حلو .. أكتب عن القيمة الغذائية الموجودة في كتاب أبلة نظيرة الاختلاف التناظري المضاد عند منى عامر ..
أيه رأيك ؟

يابني روح دور لك على عروسة عشان تتنيل على عينك تتجوز ، على الأقل لو مت حتلاقي حد يصوت عليك ..

جاتك ستين نيلة يا بعيد !
وائل ..
عرين الغضب برضه .. هأوأوأو ..

غير معرف يقول...

وائل يا بنى انا قرايت البوست الجميل اللى انت عاملة على النت مع انى مش فاضى اقرا مواضيع على النت علشان المشغولايات اللى انت كتبتها بس على العموم انا قريت كلامك وانت نورتنى على حاجات كتير
انا لازم انزل الشارع واشوف الناس
اقولك انا هديك ميعاد تيجى تقابلنى فية وننزل للناس سوا اية رايك يوم الخميس اللى جاى بعد متخلص شغلك اللى فى المحلة تقابلنى الساعة خمسة قدام عمارات العبور فى صلاح سلام وننزل للناس سوا وبلاش تيجى مع الواد صحبك دا اللى اسمه محمود ولا العربية بتاعتة احنا هننزل بال128 بتاعتى
امضاء
محمد حسنى مبارك
رئيس الجمهورية

maha zein يقول...

طبعا عوزة اقولك اني فطست من الضحك علي الكام لفظ العسل الي انت قلتهم دول
اسلوب بسيط خفيف قريب مننا
وقال ايه واحنا مالنا احنا بالعالم حوالينا
وربنا جامد
بص مش عرفة انقيلك كام جملة عجبوني وضحكوني اوي لان اصلا الكلام حلو جد
سيبك من انك بتتكلم عن الريس او بتقول الي نفسنا نقوله
لا
انت كنت لزيز هنا وي
بس انا عندي تساؤل
سيادتك اتقرصت اليومين دول ولا حاجة في حاجة
يعني رحت تجيب عيش وافشوك يا حلاوة ولا كنت بتخلص ورق وفت عليهم بركة ولا ايه
مالك بقالك كام بوست نازل شتيمة في الحكومة والناس
عموما حاجة حلوة انك تحس انك عاوز تتكلم وتقول الي في نفسك ومحدش يقدر يلوم عليك حتي لو اختلفنا معاك في بعض الحجات
اشكرك يا عرين علي صبرك علي في تقصيري معاك في التعليق
بس اكيد انت مقدر انشغالى
ومتزعلش حتي لو اتاخرت عليك في التعليق
بس خليك عارف ان اي بوست اول ما بينزل بكون اول وحدة قرياه بجد والله
بس ممكن مش بقدر اعلق لضيق الوقت
تحياتي يا حلاوة
جمدة حلاوة دي

غير معرف يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Home Broker, I hope you enjoy. The address is http://home-broker-brasil.blogspot.com. A hug.

غير معرف يقول...

يسلمو عالبوست الجميل ده
بجد بوست شامل متكامل منسيتش حاجة فيه
ولذيذ موضوع انك رادد على نفسك اول رد
وبالرغم ان ده تاني بوست اقراه لك بعد بوست ولاد....
الا ان ارائك واسلوبك فالكتابة عجبني
للأمام دايما في انتظار جديدك

غير معرف يقول...

نبيلة
ـــــ

شكلك هتروح في داهيه ياوائل بس اوعي تجيب سيرتي

انت تمام

RASHA يقول...

,وائل بجد جميل اوى والاجمل انه مضحك ومبكى كانه مسرحية هزلية تحياتى لجرأتك وصراحتك