22‏/6‏/2008

أسمه (هجرس) !!

(هجرس) ..

هذا اسمه !!

لم تمكنه أعوام عمره الستة من معرفة ما يعنيه أسمه هذا !!

حتى أبوه لم يكن يعرف معناه .. إلا أنه أصر على تسميته بهذا الاسم ! ربما لقوة رنينه في النطق؟؟ أم لعله سمع من قبل في أحد البرامج التلفزيونية أنه اسم من أسماء (الأسد) ؟؟ لا أدري تحديداً !!


(هجرس) ..

تعود هو أن يجيب من ينطق هذا الاسم ككل الأطفال في سنه دون أن يلتفت لغرابته أو حتى ندرته !!

تريدون رؤيته ؟؟

دعونا نذهب له ..

أعتقد أنه موجود أمام منزله الآن ..

نعم .. ناصية تلك الحارة الضيقة في أحد الأحياء الشعبية المعدمة !!

ها هو ..


(هجرس) ..

لا ليس هذا الولد ..

الذي يقف على يمينه هو (هجرس) ..

لا تتأثروا من منظر ملابسه البالية من فضلكم .. راعوا قليلاً مشاعره الخاصة ، فهو لا ذنب له في فقره .. أنها ظروف بلد بأكملها .. عليكم أن تعوا هذا جيداً ..

...

أعتقد أن مظاهر المرض تبدو على ملامحه ، أليس كذلك ؟؟

على أي حال أنا لا استبعد أن لا يصاب طفل في مثل سنه بالمرض ، خصوصاً أنه الآن يمشي حافياً في مياة المجاري الطافحة بطول الحارة .. أستطيع أن أميز اخضرار سطح الماء من مكاني هذا .. أهذه طحالب أم عفن فطري يا ترى ؟؟

بعضكم يقول أنه بدأ يأنف من الرائحة الشنيعة ؟؟

غريبة .. مع إن (هجرس) لا يشعر بها بتاتاً ..

ها هو يلهو ويلعب مع جيرانه في الحارة بلا ضيق أن سأم ..

فأي رائحة تتكلمون عنها ؟؟

الذباب هنا سمج للغاية ، واضح أنه يتمتع بصفات (بيولوجية) وتناسلية غير عادية .. أعداد رهيبة من الذباب تملأ المكان .. الغريبة أن هذا الذباب لا يتجمع إلا علينا نحن !! كأنه يوجد معاهدة سرية بين السكان والذباب مضمونها ألا يتعرض أي طرف للطرف الأخر .. هنا نجد نموذج مبسط للسلام والتعايش الآمن .. ربما لهذا السبب لا يتضايق (هجرس) ورفاقه من الذباب الذي يملأ وجهه ..

هل يضايقكم الذباب ؟؟

كفوا قليلاً عن رفاهيتكم أيها المدللين ، ودعونا نقترب أكثر من هذا الطفل ..

توقف (هجرس) عن السؤال عن أبيه منذ مدة طويلة ..

لابد أنه عرف أنه مات ..

من ثلاث سنوات تحديداً ..

ولم يشعر (هجرس) بغرابة الأمر .. فمعظم رفقائه أيتام من ناحية الأب ، لدرجة أنه يعتقد أن الآباء يموتون عند سن معينة يبلغونها ، كأنما انتهت رسالتهم في الدنيا !!

أما آباء أصدقاءه الأحياء فهم في السجن بسبب تهم عديدة منتشرة في منطقتهم .. أغلبها البلطجة والاتجار في المخدرات !! لا يخفي عليكم هذا بالطبع !


يتميز (هجرس) عن رفقائه بأنه ذو شخصية مسيطرة ومهيمنة على الآخرين من أصدقائه ، برغم أنه أصغرهم سناً .. إلا أنهم يعتبرونه قائدهم .. هو وحده من يقرر أي لعبة يلعبونها في الحارة .. استغماية ؟؟ أم (عم عنكب شد وأركب ) ؟؟ حتى أنه من ينظم الفريقين المشاركين في اللعب بـ (الكرة الشراب) المهترئة والتي هي نتاج غير واضح الملامح من أسمال ثياب الموجودة في بيوت كل الأطفال ، لكنهم يلعبون بها برضا على أي حال ..

لسبب غامض يرفض (هجرس) إشراك الفتيات في أي لعبة .. ربما لإنه محروم من الأخوة ؟؟ أم لأنه يرى أنه من العيب أن يلعب الصبي مع فتاة ؟؟

ثمة تصرفات أخرى يقوم بها (هجرس) لا أجد لا تفسيراً ..

ربما لأني لم أقترب منه كما ينبغي ..

لذلك سأترككم معه قليلاً .. من يريد متابعة (هجرس) فليتفضل :


*********************

الجو حر جداً النهاردة ..

إحساس (وحش) جداً أني أصحى من النوم بسبب العرق (الكتير) ..

الواد صاحبي (رمضان) عندهم مروحة في الأوضة بتاعتهم .. يابخته .. تلاقيه نايم لحد دلوقت ومش حاسس بحاجة !! بس يا ترى هو حيعملها على روحه زي كل يوم ؟؟

هاهاهاهاها ..

الواد (رمضان) ده عمره ما حيبقى راجل أبداً ..

لما أقوم من النوم بقى ..

يا ساتر على الحر !! أكيد ربنا زعلان مننا عشان كدة هو (مسخن) السما أوي كدة النهاردة !! بس أحنا ناس طيبين وبنحبه أوي .. عشان كدة هو لسة بيحبنا أحنا كمان .. أمي دايماً تقولي أن ربنا حلو وطيب !! والنبي يا رب خلي الدنيا طراوة النهاردة .. أمي مش بتحب الحر هي كمان ..

أمي !! أنا بحبها أوي .. ساعات بحبها أكتر من ربنا .. ومش عارف هي ليه بتزعل لما بقول لها كدة ؟؟

هي أمي فين ؟؟

لازم راحت تجيب فطار من السوق ..

طب أنا حغسل وشي وأستناها لما تيجي ..

هو أنا أيه اللي صحاني بدري كدة ؟؟

أه صحيح .. الدنيا حر النهاردة ..

...

أيه الدوشة دي ؟؟

لما أروح أبص من الشباك أشوف فيه أيه ؟؟

يووووووووه ..

ده الأسطى (غريب) الميكانيكي بيتخانق مع (دوكش) بتاع القهوة زي كل يوم .. الناس دي مابتزهقش ؟؟

أنا نفسي أطلع قوي زي الأسطى (غريب) .. بس هو راجل وحش ومش كويس وبيتخانق مع دبان وشه .. أنا فاكر أنه ضرب صاحبي (حسين) بالقلم جامد على وشه عشان أتأخر على فتح الورشة ، ساعتها (حسين) صعب عليا قوي .. بجد كان نفسي أضرب (غريب) بالشلوط على (****) (بالجامد) عشان يحرم يضرب (حسين) تاني .. الناس بتقول أن أبو (حسين) سافر برة عشان يشتغل .. مش فاكر إن راح الكويت واللا (السوعودية) ؟؟ بس بقاله كتير محدش عارف حاجه عنه !! أم (حسين) طلعته من المدرسة عشان يشتغل صبي عند (غريب) .. الواد (حسين) طلع راجل بجد .. بس ياريت الحمار اللي اسمه (غريب) يبطل يشتمه ويضربه !! يا رب لو بتحب النبي خلي أبو (حسين) يرجع تاني لبيته !!

نفسي أكبر وأطلع راجل (كسيب) عشان أصرف على أمي وأخليها تبطل شغل في بيوت الناس الأغنيا ..

مش قادر أنسى لما بتوع البوليس جم أخدوا أمي عشان واحدة ست غنية قالت أنها سرقت منها صيغة دهب .. أمي عيطت وحلفت برحمة ابويا أنها ماخدتش حاجة خالص .. بس بتوع البوليس ماصدقوهاش وخدوها معاهم على النقطة .. ساعتها أنا كنت خايف أوي على أمي .. عيطت كتير قوي .. يمكن عيطت أكتر من (حسين) لما أتضرب بالقلم من (غريب) .. كنت خايف لأمي تروح هية كمان .. ساعتها دعيت ربنا كتير أوي عشان أمي ترجع تاني من النقطة .. نزلت ورحت الجامع الكبير اللي بيقولوا عليه أنه بيت ربنا ، ودعيت له بصوت عالي عشان يسمعني كويس وأنا بعيط .. أنا مكنتش مكسوف وأنا بعيط قدام ربنا خالص .. أنا مرة سمعت الشيخ (حمدي) بيقول أن ربنا بيحب الناس اللي بتدعي له وهي بتعيط !!

بس الحمد لله .. يومها أمي رجعت من النقطة ، وطلع أن الولة أبن الست الغنية هو اللي أخد الصيغة بتاعتها .. هم كل الأغنيا وحشين كدة ؟؟

مش حنسى منظر أمي لما شفتها ساعتها .. عرفت أد أيه أنا بحب أمي .. وفهمت أني مش لازم أخليها تزعل مني أبداً ..

أنا جعان قوي ..

وأمي أتأخرت قوي المرة دي ..

جرى أيه يا واد يا (هجرس) ؟؟

إزاي تخلي أمك تنزل تجيب الأكل وأنت قاعد في البيت ؟؟ دي مش تصرفات رجالة أبداً .. بعد كدة أنت تروح تجيب حاجات البيت كلها .. بعدين السوق قريب مش بعيد .. يعني مش حتوه !!

نفسي أكبر بسرعة بقى ..

عايز أطلع دكتور زي أبن خالة الواد (رياض) .. شكله حلو قوي هو لابس البالطو الأبيض .. بس أنا مش حاخد فلوس من الناس .. نفسي الناس كلها تبقى كويسة .. مش حخلي حد يموت زي أبويا ..

هي أمي أتأخرت كدة ليه ؟؟

أنا جعان قوي ..

الدنيا حر موت النهاردة ..

والنبي يا رب آآآ ..

هو يا ربنا أنا ممكن أقول لك على كذا حاجة مع بعض ؟؟ قصدي يعني مش حاجة واحدة بس ؟؟

أصل أنا عايز أقول لك على حاجات كتير قوي نفسي فيها ..


*********************


(هجرس) ..

أنه لا يعلم أن في هذه اللحظة يتحرش نجار الحارة بأمه وهي تحمل إفطار قد يكفي أو لا يكفي لإشباع صغيرها الذي ينتظرها .. ولن يعرف كم العبارات الخادشة للحياء التي يلقيها الناس على أمه الصغيرة في السن – والجميلة كذلك – من أجل مراودتها عن نفسها في كل مرة تنزل الحارة !


(هجرس) ..

أنه يجهل أن أثناء وقفته هذه سيتلقى خد صديقه (حسين) صفعة قاسية سيفقد على أثرها السمع طيلة حياته من الأسطى (غريب) الثائر بسبب شجاره مع (دوكش) ..


(هجرس)..

لن يفهم أبداً بأن (دوكش) هذا قد باع ليلة أمس صنفاً مغشوشاً للأسطى (غريب) ، مما جعل موقف (غريب) محرجاً أثناء قيامه بواجبه الزوجي ، وأن زوجة (غريب) قد اتهمته على الملأ هذا الصباح أنه أصبح: خايب ونايب وعايب وعرة الرجالة !!


(هجرس)..

لن يتخيل للحظة كم الإهانات التي يتلقاها أبو صديقه (حسين) من الكفيل السعودي والذي يعمل عنده منذ سنوات مضت ، دون أن يكون له الحق في إرسال المال لعائلته ، أو حتى الرجوع لهم .. هذا لأن الكفيل استولى على جواز سفره عنوة .. كما أنه يحتفظ بإيصالات موقعه من أبو (حسين) بمبالغ خيالية .. مع أن أبو (حسين) يجهل تماماً القراءة والكتابة !!


(هجرس) ..

المسكين لن يعرف أبداً بأن صدر أمه بدأ ينمو فيه المرض (البطّال) ..


(هجرس)..

هل تشعر هذه الجراثيم المجهرية الآثمة ما تفعله بكليتيه الصغيرتين الوردتين ؟؟ هل تفهم بأنها ستقضي قريباً على هذا الطفل بشراسة ؟؟ هل تعرف هذه الكائنات بأنها ضمن كيان سيرحل قريباً ..

كيان اسمه ..

(هجرس) ؟؟

هناك 5 تعليقات:

غير معرف يقول...

هجرس
الاسد الجريح هل هذا هو اسقاط على الحياة الاجتماعية للمجتمع المصرى الذى يعانى من مشاكل الصرف الصحى والبطالة والمخدرات والمواد المسرطنة وانتشار قلة الحياء و تراجع مستوى الشهامة لدى المجتمع المصرى
وهل هذا الاسد الجريح سوف يتدواى من جراحة ام انك بهذا الاسقاط المعذب اسقطت كل دواعى الشفاء ومالة ان يقوم من جرحة مرة اخرى
او ان هناك دواء للجرح ولكنه
حــــــــــــين مـــــــيســــــرة

غير معرف يقول...

مش عارف صح انت دخلت فى اطار الحارة المصريه الضعيفه الرزق اللي بتدور ع قووت يوم بيوم المهم يلاا تابع وانت شوقتنا لهجرس بس مش اسم صعب شويه وكبييير كنت محتاج اسم بلدي وشعبي اكتر وكمان السوعوديه كنت تقصد بيها انها على لسان الولد ولا غلطه مطبعيه بس اطن الاولانيه صح يا وئووول يلا قشطه وتاااابع باااي

ayar يقول...

اكتئاب وانا مش ناقصة ..
حلو العرض واسلوب الصياغه .. ومؤلم ومأساوى

غير معرف يقول...

نبيله
ــــ

جديده عليا اسلوب السرد ده علي الرغم من اني سمعت وشفت كتير قصص مماثله عن اولاد الشوارع... بجد حلوه اوي لكني مش قادره احسها اكتر لاني مغلوله من القصه اللي قبليها (خربشات عاطفيه)

الثلج الأسود يقول...

مأساويات متتاليه
اسلوبك رائع كعادتك ،، بس كنت متوقه اسوأ ماعرفش ليه