24‏/6‏/2008

مسألة مبدأ !!

لظروف صحية طارئة ترتب عليها استعمالي لأحد الأدوية الغريبة المفعول والمحتوى ، ظهرت تشققات في شفتاي (أشف يعني) كنوع من الأعراض الجانبية لهذا الدواء !!

وبدأت الأعراض تزداد يوماً بعد يوم ..

حتى وصلت اليوم إلى مرحلة مريبة بعض الشيء !! فمن يرى شفتاي يجد شبهاً مطابقاً لشفتي جمل بالغ !! بل أني ابتسمت مرة واحدة هذا الصباح فزادت التشققات وبدأ الدم يسيل من شفتاي الجافتين ..

هنا قررت أن أضع حداً لهذه المهزلة (الشفوية) ، وبدأت البحث عن علاج لجفاف شفتاي الدائم هذا !! مع العلم بأن هذه أول إصابة لي بهذه الأعراض ..

أثناء جلوسي على مكتبي في العمل ، تردد صوتاً فوق رأسي أشبه برنة جرس وحيد النغمة : (تن) ..

ونظرت لأعلى لأجد لمبة كهربائية مضاءة فوق رأسي تماماً ، لدرجة أن قاعدتها كادت أن تلامس شعر رأسي الأشعث !! واستطعت أميز بأن اللمبة (قلاووظ) وقوتها (100 وات) ..

وكي أوضح لكم .. معنى ذلك أن قريحتي المتواضعة قد منت علي بفكرة ممتازة ، مع العلم بأني لا أعير معظم أفكار قريحتي اهتماماً إذا كانت أقل من (74 وات) !!


 

المهم !!

كانت الفكرة ببساطة شديدة هي :

زبده كاكاو !


 

******************************************


 

  • زبدة كاكاو أيه بس يا عم أنت اللي عايز تروح تجيبها ؟؟

(أنا بسأل نفسي)

  • حعمل أيه طيب ؟؟ مش قادر أفتح بقي من الدوا الزفت ده !! قال أيه : الدكتورة بتقول أني عندي دهون وهرمونات زيادة !! مع أن شكلي عامل زي الخلة اللي متعاصة لحم !! قال دهون قال .. أنا من الأول شاكك في الدكتورة دي !! شكلها خريجة كلية زراعة بس ربنا فتحها عليها !! بس من الأخر مفيش غير البتاع ده اللي اسمه (زبده كاكاو) !!

(دي نفسي بترد عليا) ..

  • خلاص يا عم .. زي بعضه ، مشيها زبده كاكاو .. بس هي ليه اسمها زبده كاكاو ؟؟
  • مش وقت تأملات دلوقتي .. روح ياللا هات البتاعة دي وأخلص .. مش عارف أتكلم خالص !!
  • يا عم بالراحة ما تزقش ..


 

زبده كاكاو ..

طيب .. الصيدلية جنب الموقع اللي بشتغل فيه .. يعني مشوار مش بعيد ولا حاجة ..


 

*****************


 

(في الطريق للصيدلية) ..

  • طب هو أنا حقول للصيدلي : لو سمحت عايز زبده كاكاو كدة عادي ؟؟
  • أمال حتقول أيه ؟ لو سمحت عايز (دهن صحي ناتج طحن وتحمير ثمرة الكاكاو الاستوائية؟) .
  • مش قصدي كدة .. أصل يعني أنا راجل وكدة !!
  • ما أنا عارف أنك راجل يا عم .. وسيد الرجالة كمان .. أيه المشكلة ؟؟
  • أزاي حدخل الصيدلية وأقول (لو سمحت عايز زبده كاكاو) ؟؟
  • عادي جداً .. حتدخل الصيدلية برجلك ، بعدين تسحب هوا من مناخيرك ، وتطلعه من حنجرتك وتحرك شفايفك (المأشفة) على الحروف بتاعة الجملة دي (لو سمحت عايز زبده كاكاو) .. مش مجهود خارق ولا حاجة !!
  • يوووووووووووه .. أنت ممل كدة ليه ؟؟
  • أنا ممل برضه ؟؟ أنت اللي مش طبيعي النهاردة ..
  • أنا قصدي أن الحاجات دي بتاعة الحريم بس !!
  • حريم أيه ياض أنت ياض ؟؟ دى زبده كاكاو لا راحت ولا جت .. حتجيبها وتملس بيها على شفايفك رايح جاي .. وخلص الفيلم على كدة .. إلا إذا بقى ..
  • إلا إذا أيه ؟؟
  • يعني .. يمكن نزلوا معاها إرشادات خاصة بالاستعمال مكتوب فيها إنك لازم تلبس طرحة فوشيا .. واللا جذمة بكعب .. واللا لامؤاخذة يعني تلبس آآآآ ..
  • يا عم بس بقى .. بقولك أيه .. أقعد ساكت خالص .. أوعى تتكلم لحد لما أجيب البتاع ده ..
  • حاضر .. بس كدة ؟

زبده كاكاو ؟؟ أول مرة حستعملها في حياتي .. يادي الفضيحة .. زبدة كاكاو ؟؟ أنا ؟؟


 

*****************


 

(داخل الصيدلية) ..

انتظرت فترة حتى خلت الصيدلية من الناس فيما عداي أنا والصيدلي ..

  • السلام عليك .
  • وعليكم السلام ورحمة الله وبركاته ، أؤمر يا (باشموهندس) ..
  • الأمر لله .. من فضلك كنت عايز آآآآآآآآآ

(بشك وريبة) :

  • عايز أيه يا باشا ؟
  • عايز زبده ك*&*^% .
  • نعم ؟
  • عايز زبدة كاكاو .
  • خضتني يا (باشموهندس) .. افتكرك عايز حاجة ممنوعة لا سمح الله ..
  • الحمد لله ماليش في الحاجات دي .. في زبده كاكاو ؟
  • أه طبعاً فيه .. لحظة واحدة .. أتفضل .

وجهت نظري إلى (صباع الزبده) الموضوع على المنضدة الزجاجية برعب !! كأني أنظر إلى عقرب ضخم يخرج من مؤخرته ذيل أفعى جرس وله 4 أذرع إخطبوط بممصاته المقززة !!

  • مفيش حاجة أصغر من كدة ؟؟
  • لا والله يا (باشموهندس) .. ده أصغر حاجة .
  • أيه ده يا دكتور ؟؟ ده بطعم جوز الهند .. أمال (زبده كاكاو) أزاي ؟؟
  • عادي والله يا باشا .. مش شرط يعني !!

(وجدت نفسي أماطل .. ربما أحاول محاولة أخرى بائسة كي لا أشتري هذا البتاع) !!

  • طب مافيش بطعم الفراولة ؟؟
  • هاهاهاها .. فراولة أيه يا باشا ؟؟ لا مفيش طبعاً .. بعدين خد بالك أن الفراولة لونها أحمر .

ألكزتني رجولتي بعنف عندما فهمت قصده .. فكسيت وجهي بمعالم خشنة لا إرادياً .. كأنها ستارة عملاقة نزلت على جميع معالم وجهي وغطته بقماش كثيف أحمر غاضب .. فقلت بلامبالاة :

  • ماشي .. خلاص حاخد ده ! الحساب كام من فضلك ؟؟


 

*****************

(في الطريق للموقع) ..

لاحظت أني أضع (البتاع) في جيبي .. للدقة الموضعية : أضعه داخل يدي التي هي في جيبي .. كأني أخشى أن يطير من جيبي فجأة ويفتضح أمري أمام الناس !!

كنت أشبه بالمشبوهين في مشيتي هذه ..

كأني أضع جثة كاملة داخل جيبي أو 4 طن أفيون أفغاني عالي الجودة !!

نظرات وجهي تكاد أن تصرخ للناس من حولي :

  • نعم أيها السادة .. أنا لا أحمل أصبع (زبده كاكاو بطعم جوز الهند) في جيبي ! أطمئنوا .. كل شيء على ما يرام !

هو الموقع بقى بعيد كدة ليه ؟؟

الجو حر مووووووووت النهاردة .. ياترى الجمل بتبقى شفايفه عاملة زيي كدة في الحر ده ؟؟ يا بخت الجمال .. عمرها ما حتحط (زبده كاكاو ) أبداً ..

هي الست دي بتبص لي قوي كدة ليه ؟؟ جرى أيه يا ولية ؟؟ خليكي في حالك أمال ..

  • بــــــــــــــخ .
  • يوووووووووووووووووووووووووووه .. أيه اللي جابك تاني ؟؟ أنا مش ناقصك خالص دلوقتي .. كفاية اللي أنا فيه !!
  • يا أخي أنت عامل أزمة كدة ليه ؟؟ شكلك عامل زي اللي بيطلعوا مع (طارق علام) في برنامج (المواجهة) !! أنت شوية وناقص تصرخ في الشارع (أنا ماقتلتهوش .. برئ يا بيه) .. أهدى كدة وروق ..
  • عليا النعمة أنت بارد !
  • جاتك نيلة .. برود أيه في الحر ده !! هو حد لاقي ؟؟
  • مش ناقصك خالص ..
  • طب بقولك أيه ؟ أنت شفت الصلاحية بتاعة زبده الكاكاو ؟؟ طلعها وبص عليها .. أحنا لسة قريبين من الصيدلية .. لو طلع قديم روح رجعه .. بالمرة شوف معمول فين والحركات دي .
  • عايزني أطلعه في وسط الشارع ؟؟ يا عيب الشوم .
  • عيب الشوم ؟؟ أنت بتجيب الكلام ده منين ؟؟ يا خسارة تربيتي فيك !!
  • يا عم أنت مالك بيا .. حتى لو كان مكتوب عليه (صنع في المنوفية) .. أنت مالك ؟
  • أنا غلطان ..
  • أيوة غلطان .. وياريت تستخبى تاني عشان أنا وصلت للموقع .
  • أمرك يا سيدي ..
  • بموت فيك وأنت مطيع ..


 

*****************


 

(داخل الموقع) ..

فوجئت من توجهي مباشرة إلى مكتبي .. وكادت أن تخرج يدي بالأصبع الآثم لاستعمله أمام مديري الياباني ..

اليابانيين معروفين بفضولهم الغير عادي .. فضول يكتسح فضول أي قط صادفته في حياتي ..

وطبعاً مع شخصية مثلي أنا .. يتضاعف فضولهم هذا بطرق عديدة وشتى !!

ولا استبعد مشهد مديري عندما يراني في فعلتي هذه ..

حتماً سيصرخ منبهراً كعادته .. ويسرع إلى كاميرته الجاهزة للاستعمال دائماً .. ويلتقط لي صوراً بحرفة عالية ، ومن عدة زوايا .. ثم يرسل هذه الفضيحة إلى كل معارفه بلا استثناء .. ثم ينادي باقي الزملاء اليابانيين ليأخذوا معي صوراً جماعية في هذه المناسبة العظيمة ..

فيكون الناتج :صورة تحوي 7 يابانيين على وجوههم علامات السرور والدهشة معاً ، ويشكلون بأصبعهم حرف V .. يتوسطهم شاب مصري مذهول الملامح ، وفي يده لامؤاخدة (صباع زبده كاكاو بنكهة جوز الهند) ..

يفتح الله ..

نظرت لمديري الياباني نظرة غضب فجأة لم يفهم هو معناها .. وغادرت مكتبي متوجهاً إلى الحمام ..

إذا بليتم فاستتروا ..


 

*****************

(داخل الحمام) ..

بأيد مرتجفة أخرجت صباع (زبده الكاكاو) من جيبي ..

ضربات قلبي تتسارع .. أتمنى أن لا يدخل أحد الآن ..

تمنيت أن يكون الجو الحار الشنيع كفيلاً لإفراغ مثانة كل المهندسين والإداريين في هذا المشروع ، المصريين منهم واليابانيين !! كما أن العرق صحي ومفيد أيضاً ..


 

الأصبع في يدي الآن ..

أفتحه في تقزز ..

لحظة !

لماذا أنظر للمرأة الآن ؟؟


 

يا وقعة سودة ؟؟

هي حصلت ؟؟

هو أنا – لا سمح الله – بحط روج ؟؟

أيه اللي بتعمله ده يا عم الحاج ؟؟

داخل الحمام عشان تصلح (التواليت) بتاعك ..

أو زي ما بيقولوا البنات الهاي لايف :

داخلة أظبط الميك أب وراجعة تاني .

يا ليلة سودة يا ولاد ..

المراية ؟؟

أمشي ياض من هنا بسرعة ..

!!!

بس أروح فين ؟؟

مفيش مكان غير هنا !! خلص بقى في الليلة الكحل يدي ..


 

*****************

(داخل الحمام الكبير ) .. مرة أخرى!


 

الصباع في أيدي دلوقتي ..

شفايفي بتترعش ، كأني ماسك موس في أيدي وناوي أقطعهم ..

نظرة أخيرة على المادة البيضا اللي شكلها لوحده يقرف ..

أيدي بتقرب على شفايفي ..

...

أيدي لسة بتقرب على شفايفي ..


 

((((((((((((((((((((((((((((((((((

الشفة اللي تحت ..

تمام يا فندم ..


 

حلو ..

أطلع على الشفة اللي فوق ..

حاضر يا فندم ..


 

)))))))))))))))))))))))))))))))))

الشفة اللي فوق ..

تمام يا فندم ..


 

كله تمام ؟

كله تمام يا فندم .


 

طبعاً أحساس شنيع ومريع ..

زي ما يكون بمشّي بطن ضفدعة ساقع وبارد وأملس على شفايفي ..

!!!!!

لو كنت مايع ومايص .. كنت صرخت جوة الحمام : يااااع ..

بس الحمد لله .. العملية نجحت ..

مافيش إصابات ..

رجعت الصباع تاني في جيبي ..

ولا مين شاف .. ولا مين دري ..

  • بالشفا يا عم .. خسيت كام كيلو ؟
  • مالكش دعوة .. أرجع زي ما كنت ، مش عايز أسمع صوتك لحد لما نروح ..
  • حاضر .


 

*****************

(خارج الحمام) ..


 

باب الحمام يفتح ببطء ..

يخرج منه شخص واثق الخطى يمشي ملكاً ..

كأنه انتهى لتوه من القيام بغزوة حربية عاتية ناجحة على شعب وهمي يسكن داخل الحمام ..

على وجهه راحة ما .. وهذا طبيعي لكل من يخرج من الحمام !!

لكن ..

لماذا تلمع شفتيه هكذا ؟؟


 


 

هناك 9 تعليقات:

maha zein يقول...
أزال أحد مشرفي المدونة هذا التعليق.
maha zein يقول...

بخصوص البوست ده اد ايه حلو جدا
اولا حمد الله علي سلامتك
وشفايفك
وذي ما الجمل شفايفة بتعمل كده الا انه بردو بيتحمل اوي
اتحمل يا وحش
وعادي زبدة الكاكاو للجدعان
ومش شبهة ولا حاجة
انشاء الله هتخففك
بس في حاجة اوعه وخلي بالك لانها ليها ريحة وده طبعا غير اللمعة
نصيحة من اختك الواعية
زبدة الكاكاو بطعم الكيوى ليها مذاق رائع
وريحة نفاذة ابقه فكر تجربها
وهي بيضة متخفش
بوست لذيذ جدا
تحياتى يا عرين

ayman badr يقول...

يا عم حمد لله على السلامة للدرجة دى التجربة صعبة
بس بجد وصف هايل وسرد جميل جدا
تحياتى

كاتب مصري يقول...

دخلت هنا زائرا عابرا..لكني أصررت بعد أن رأيت هذا الإبداع أن لا أخرج إلا وقد صرت صديقا لهذه المدونة الرائعة..
تحيتي وأتمنى أن أراك قريبا على مدونتي ولتكن هذه دعوى معطرة لزيارتي وتشريفي في مدونتي ..
مدونتي هنا
http://kanyatklam.blogspot.com/
أنتظر الزيارة والتعليق أو حتى التوقيع بالحضور..

كاتب مصري يقول...

دخلت هنا زائرا عابرا..لكني أصررت بعد أن رأيت هذا الإبداع أن لا أخرج إلا وقد صرت صديقا لهذه المدونة الرائعة..
تحيتي وأتمنى أن أراك قريبا على مدونتي ولتكن هذه دعوى معطرة لزيارتي وتشريفي في مدونتي ..
مدونتي هنا
http://kanyatklam.blogspot.com/
أنتظر الزيارة والتعليق أو حتى التوقيع بالحضور..

ayar يقول...

هههههههههههههههه
تعيش وتاخد غيرها يابوب
بس الف سلامة برده!!!

غير معرف يقول...

نبيله
ـــــ
يانهار ياوائل... ياراجل ده فيلم في ايه ... الف سلامه عليك ... ولو اني شايفه انك بتدلع شويه وجع في شفايفك عملي عليه قصه وروايه بطلو دلع بقي .. هوه ايه ده ياخويا ده

غير معرف يقول...

حركة رهيبة منك يا وائل بس لو قولتلي من الاول كان جبتلك زبدة كاكاو بدون ما تروح الصيدلية
هههههههههههههههههههههههههه
بجد حلوة جدا

غير معرف يقول...

حركة رهيبة منك يا وائل بس لو قولتلي من الاول كان جبتلك زبدة كاكاو بدون ما تروح الصيدلية
هههههههههههههههههههههههههه
بجد حلوة جدا