2‏/7‏/2008

(كان) فعل فاضح !

عندما قرأت موضوع الزميل (أيمن بدر) الخاص باللغة العربية ، قررت إبداء رأيي الخاص في تعليقي عنده لشدة إعجابي بفكرة الموضوع ..

أثناء كتابة تعليقي شردت قليلاً مع نفسي عن اللغة ..

ربما ذكرت هنا من قبل عدة رأيي الخاص عما يحدث الآن من إهمال في اللغة ..

ثم بدأت عدة حقائق واقعية تردد في رأسي مثل :

معظم المصريين – بما فيهم أنا – لا يحسنون كتابة سطرين باللغة العربية بدون أخطاء !

طبعاً الشباب – بما فيهم أنا أيضاً – لهم دور كبير ومخجل في هذه الكارثة .. فنحن من نحمل شعلة اللغة ، ونمررها للجيل الجديد (أطفالنا نحن) .. فبدلاً من أن تكون الشعلة وضاءة ومنيرة ، ستكون – للأسف – خاملة وخامدة ..

هذا واقع صعب تغييره .. وغداً سيكون المستقبل ماسخ بلا معنى ..

(سوداوي صح ؟!)..


 

**************


 

مرة كنت أتحدث مع صديقي في شئون اللغة ، فجاء ذكر (كان) ، فسألته إن كان يتذكر إعراب (كان) !

فرد علي قائلاً بجدية :

  • كان فعل ماضي مبني على الضمة .

ألجمتني إجابته وأصابتني بتيبّس في عقلي وشلل في حنجرتي ، فصرخت بأعلى صوت لي قائلاً :

  • نعم يا حبيب ماما ؟؟ (كان) فعل ؟؟ يا نهار أسود !!

ثم أنهلت عليه بوابل محترم من السباب الغير محترم ، مضمونه الجهل والتلبد الفكري والتعليمي والوطني باعتبار اللغة جزء لا يتجزأ من وطنية المواطن ..

ثم شردت قليلاً وتذكرت شيئاً مهماً ..

(كان فعل ماضي مانسيبه في حاله) ..

جزء من أغنية (أبجد هوز حطى كلمن .. شكل الأستاذ بقى منسجمُ ّ) للمغنية الراحلة (ليلى علوي) ..

ليلى مراد ؟؟

حسناً المغنية الراحلة (ليلى مراد) !

صديقي العزيز يأخذ ثقافته من أغاني الأفلام الأبيض والأسود ..


 

( أبجد هوز حطي كلمن سعفص قرشت ثخذ ضظغ )

ما معنى هذا الترتيب بالمناسبة ؟؟


 

فنظرت لصديقي وابتسمت .. فسألني هو :

  • يعني أنت فاكر إعراب (كان) أيه ؟؟
  • طبعاً يا أبني .. أنت بتتكلم في أيه ؟
  • طب أيه هو يا عم الفلحوس .
  • كان ليها مبتدأ وخبر يا جاهل .. يعني مش فعل يا حلوف .
  • أه صحيح .. تصدق نسيت الحكاية دي ؟
  • بس يا جاهل ..
  • ماشي يا عم .. بس (كان) دي بتنيل أيه في المبتدأ ، وبتهبب أيه في الخبر ؟
  • آآآآآآ ..

يا نهار أسود ؟؟

كان ؟؟

هل كانت ترفع المبتدأ وتنصب الخبر ؟؟

أم تنصب المبدأ وترفع الخبر ؟؟

كل ما أتذكره أنها عكس (أن) ..

كان ؟؟

كان وأخواتها ..

(كان ، أصبح ، أمسى ، .. )

أين الباقي ؟؟

هم كانوا سبعة !! أين ذهبوا هؤلاء الملاعين ؟ هل تبخروا من رأسي ؟؟

أفقت على ضحكات صديقي الساخرة ومعه حق وبدأ ينهال علي بوابل غير محترم بالسباب الغير محترم !! وإن تخلله بعض الكلمات العجيبة مثل : الجهل والتلبد الفكري والتعليمي !

ثم وضع يده في جيبه وذهب لقضاء شيء ما، وتركني وحيداً أعنف نفسي على تلك الكارثة الرهيبة !


 

**************

مدرس العربي !

بالذات في المرحلة الابتدائية ..

أول متهم في تلك الكارثة ..

ربما يقع عليه عبء كبير في تنشئة الجيل ..

وإن كان في أيامي المدرسين أكثر جدية من الآن !

ففي أيام جيلي كان المدرس والطالب يشمئز من مصطلح (دروس خصوصية) .. حتى وإن كان المدرس (يثورأ لما يشوف ورك فرخة) بسبب حالته المادية القاحلة ، فكان يعتبر الدروس الخصوصية إهانة للعلم والتعليم والمعلم والمتعلم معاً .. فكان يشرح بأقصى جهده في الفصل ، والذي كان الوسيلة الوحيدة لتلقي العلم !

الآن أصبح المدرس يحمل كارت شخصي عليه أرقام (محامليه) ومراكز دروس الخصوصية المشارك بها !!

ظهر أيضاً ملصقات دعاية للمدرسين توزع حسب التوزيع الجغرافي لنطاق لسعادتهم ! كما أن المدرس الخصوصي ينتقي طلابه حسب مزاجه الشخصي وأهوائه الخاصة .. والحساب يتم بالحصة الواحدة !!

المدرس الآن أصبح وظيفته تجمع ما بين (بائع اللبن والكمساري) فهو يبيع العلم للطلبة في أكواب بلاستيكية سريعة الشرب أو باللتر ، ويحاسب على هذا وذاك .. عموماً اللهم زد وبارك ..

في وسط تلك الجلبة ..

لابد أن تتوه اللغة بين طالبي العلم ، خصوصاً دارسي اللغة الأم ..

وأن تتمزق وتحترق وتزوي وتموت في صمت ..

هذا ما يحدث الآن ..

من المسؤل عن هذة الكارسة الفزيعة ؟؟


 

**************


 

منذ أسبوعين ذهبت وحيداً إلى مطعم (هارديز) الشهير للوجبات السريعة ، وقمت بطلب وجبتي ونقدت (الكاشيير) ثمنها ، ثم جلست بلهفة في انتظار وجبتي الموعودة ..


 

(كوردن بلو) ؟؟

اسم (الساندوتش) الذي قمت بطلبه منذ لحظات !!

(كوردن بلو) ؟؟

ماذا يعني أو يعبر هذا الاسم ؟؟

ربما يعني (الكوردن الأزرق)؟؟

أنه مجرد (ساندوتش) فراخ والسلام ..

فرخة عادية قام أحد ما بذبحها وهي تتصايح في هلع !

فرخة عادية قام أحد ما بنتف ريشها وإلقائها في ماء ساخن تمهيداً لتنظيفها (والله أعلم في تلك المسألة!) !

فرخة عادية كانت تأكل ما تأكله أي فرخة عادية في أي حارة ، لا أظن أنها كانت تأكل ذرة مبشور بالكاتشاب والمايونيز !!

فرخة لا تهتم – إطلاقاً – إن كانت ستسكن معدتي الفارغة تحت اسم (كوردن بلو) بمشتملاته !!

فرخة لا تتوقع أبداً أن يباع جزء منها في المدعو (كوردن بلو) بثمن أغلى 4 أضعاف من ثمنها وهي على قيد الحياة !!

دعونا من الفرخة الآن .. فأمرها انتهى معي وتحولت إلى ذرات بداخلي منذ فترة طويلة ..

(أوردر – كوردن بلو – بطاطس فرايس – بيبسي ماكس – أونيون رينجز – أبل باي – أوكي) ..
كلها ألفاظ إنجليزية قمت باستخدامها في حوالي ثلاث دقائق أثناء إملائي رغبتي للكاشير (والذي هو أيضاً لفظ انجليزي أخر) !!

هل من العار أن أقول :

(لو سمحت عايز سندوتش فراخ مع بطاطس محمرة وحلقات بصل بالخلطة ، وفطيرة تفاح وحاجة ساقعة بيبسي ماكس) ؟؟

أم لأني دخلت (كشك) أجنبي مثل هارديز ، فأخلع عني لغتي العربية وألقيها بإهمال عند الباب كي لا يتهمني أحد بأني لا أستحق الدخول لف\مثل هذه الأماكن ؟


 

أعترف لكم أيها السادة بأني ارتكبت جريمة عظمى في هارديز يومها ..

مع أني أتكلم اللغة العربية ، والمتلقي يتحدث اللغة العربية أيضاً .. إلا أننا مارسنا نوعاً تافهاً من الاستعباط المخزي في حق لغتنا ..

فقد تبرأت من لغتي وأهملتها ..

وهي جريمة لم تقترفها حتى (الفرخة) التي أكلتها !! فالفراخ تجتمع على هوية واحدة في كل العالم .. حتى الفراخ الأمريكاني لها صوت ولهجة الفراخ المصرية !! كاك كاك ..

كوردن بلو ؟؟

الله يرحم أجدادي !


 

**************


 

الموسيقى !

هل هناك جاهل أحمق يمكنه أن ينكر الموسيقى ؟؟

الأنغام الساحرة .. الإحساس الصادق العميق ..

من العبث أن أضيع وقتي ووقتكم في وصف الموسيقى !

فكلنا نعرفها ونعشقها ..

وحسب دراسات علم النفس :

الموسيقى هي أول ما يسمعه الجنين وهو في رحم أمه ، تحديداً ضربات قلب الأم ..

لهذا يشعر كل منا بالشرود عند سماعنا الموسيقى الإيقاعية ، وأحياناً نهز رأسنا معها لا إرادياً ..

ويمكننا ملاحظة هذا بجلاء في الموسيقى العربية المعتمدة على الإيقاع الراقص ، أو الإيقاع المنتظم (الطبلة والدرامز) ..

صوت دقات قلب الأم مختزن في عقلنا الباطن ؟؟

هل نلتفت لا إرادياً للإيقاع الشبيه بدقات قلب الأم بالذات دون غيره ؟

نعم .. أنها حقيقة أيها السادة .


 

المهم ..

قررت أخيراً اعتبار الموسيقى هي لغة خاصة ..

ولدي في هذا أسبابي :

  • أنا واثق أنك لا تستطيع التحدث باللغة الصينية فجأة عند استيقاظك من النوم ، بل عليك التعلم بجدية لتتحدث وتتكلم وتكتب بها .. كما أنه ليس بإمكانك العزف على أي آلة موسيقية بدون التدريب الكافي عليها !


     

  • إذا كنت تجيد العزف على أي آله موسيقية ، وتركتها أو أهملتها فترة طويلة .. فمن الصعب عليك أن تكتسب مهاراتك السابقة عند عزفك عليها بعد غياب .. كذلك اللغة !! ليس من السهل عليك أن تسترجع منها ما فاتك بسبب إهمالك لها !! حتماً سيكون هناك بعض الأخطاء !


     

  • ما رأيك لو ذهبت لحفل كبير لعازف بيانو مشهور ، وقام بعزف عدة مقطوعات مشهورة لأغاني معروفة وذائعة الصيت ! إلا أنك لاحظت في عزفه بعض الأخطاء الصغيرة في اللحن ، فهل ستغفر له قطع استمتاعك بعزفه الرائع يا ترى ؟؟ أيضاً الكلمات ما هي إلا مجرد عزف للحن موضوعك أو حوارك مع غيرك.. فأرجوك حافظ على جودة العزف .


     

  • هذة الجمله مملوئة بالاخطاء الاملاءية ، بلااستثناء !! فهل اعجبتك يا ترا ؟


     


 

وعندما نتكلم .. تقوم الحنجرة بولادة الصوت عن طريق الهواء .. ويبدأ العزف باللسان والشفتين .. وتبدأ الكلمات بالخروج بالطريقة التي نرغبها نحن ..

وعندما تحدثني أنت ، فأنك تصدر موسيقى معينة .. وأنا أسمع موسيقاك بأذني وأترجمها في عقلي إلى معاني .. وأفهم منها ما تريد قوله لي !


 

فمن فضلك :

حافظ على نظافة لغتك ..


 

**************


 

أود أن أذكر هنا بعض الإرشادات البسيطة لقواعد الكتابة ..

ليست قواعد نحوية .. إنما قواعد بسيطة للجملة نفسها .. فهذه القواعد تقع عليها عبء كبير في تنظيم الجمل وتسهيلها للقارئ :

  • الفاصلة ( ، ) : مهمتها هي الفصل بين الجمل الطويلة المترابطة ، فتوضع في وسط جملتين كما في هذا السطر .. حاولوا التدرب عليها جيداً ، فهي ممتازة في التعبير عن قصدكم دون شوشرة أو إزعاج لمن يقرأ .. أيضاً هي ما تجعل الجملة تتنفس ! بالضبط هي كالهواء لمن يغطس مدة طويلة في جملك أنت !


     

  • النقطتين ( .. ) أحياناً ينتهي الغرض من جملة معينة ، وتليها جملة أخرى لها علاقة بالمقطع نفسه ! فتأتي هاتين النقطتين للقيام بربط غير شرطي بينهما .. حد فاهم حاجة ؟؟ لو قرأت مرة تانية ممكن تاخد بالك من قصدي .. وياريت الناس تاخد بالها أنهم أتنين بس ، يعني مش تلاتة ولا حاجة !! يعني مش يوم ما تعمل فيها كريم وسخي ، يبقى أخرك نقطة !


     

  • علامة التعجب ( ! ) .. غالباً ما تكون نهاية جملة غير مألوفة أو غريبة بعض الشيء .. أفهمها زي ما هي ، وده اللي عندي .. إذا كان عاجبك !


     

  • القوسين ( ) .. وظيفتهما احتواء لما تريد اختصاصه في جملتك .. بمعنى لو كنت تريد إبراز كلمة ما أو اسم أو عبارة قصيرة وسط الجملة ، فأنصحك صادقاً باستخدام القوسين .. (زي كدة مثلاً!) .


     

  • الجملة الاعتراضية ( ) .. أنا أحب هذه الخاصية للغاية ، ممكن أن تضعها وسط الجملة بطريقة عادية جداً .. ومن الممكن تخطي ما تحويه دون الإخلال بمعنى المقطع كله .. حقولك أزاي : فاكر لما كنت بتكلم مع صاحبي عن كان ؟؟ لما فقت على ضحكة صديقي الساخرة؟؟ مش فاكر؟؟ يا عم أطلع فوق وبص بعد كدة أنزل تاني .. شفت الجملة بتاعة (ومعه حق) ؟؟ جرب اقرأ الجملة من غير الكلمة دي .. حتلاحظ أن ليها نفس المعنى .. خدت بالك ؟؟ طب فهمت ؟؟


     

  • علامة الاستفهام ( ؟ ) .. طبعاً تبقى مصيبة سودة لو مش عارف العلامة دي بتاعة أيه !! عارف واللا مش عارف ؟؟


     

  • النقطة ( . ) .. استخدام وحيد فقط .. في أخر الجملة أو الفقرة كنهاية لها .. أما إذا كانت الجملة مرتبطة بالجملة التالية ، ففي هذه الحالة يتم استخدام النقطتين بدلاً منها .


     

  • علامات التنصيص " " .. حد أتفرج على حلقات (تامر وشوقية ) ؟؟ فاكرين الواد هيثم أو أحمد مكي لما كان بيعمل حركة بصباعين السبابة والوسطى ؟؟ دي بقى علامات التنصيص .. بس ده استخدام انجليزي ليها !! وأحياناً بيكون لغرض السخرية المهذبة .. يعني مثلاً أنا ممكن أقول على الموضوع ده أنه "رسالة دكتوراه" .. وأحياناً تستخدم في الجمل الحوارية أيضاً !


 

أتمنى – صادقاً – أن يتعلم أي من قارئي هذا الموضوع أي شيء هنا , كما أتمنى أن يتحسن أسلوب الزملاء الأعزاء في مواضيعهم الكتابية والتدوينية بعد ذلك ..

أريد القول بأني لست بمتخصص لغوي ، بل أن كل ما سبق هو محاولات اجتهادية لا أكثر .. مجهود بسيط نوعاً ما نقلته أنا من خلال ملاحظاتي الشخصية أثناء قراءة الكتب ! لذلك أرجوكم المعذرة إن سهوت في شيء ما هنا .. وثقوا تماماً بأني أرحب بأي تعديلات منكم على ما ورد .

ربنا معاكم يا شباب .


 

**************


 

في الصف الأول الإعدادي تعرفت على ميس (سحر) ..

مدرسة اللغة الإنجليزية ..

انتابتني وقتها مشاعر غريبة تجاهها ..

فهي جميلة وشابة ، ولها بحة صوت خفية محببة لي وحدي لم يلحظها زملائي في الفصل ..

أحياناً كنت أسرح قليلاً أثناء حصة اللغة الإنجليزية :

ذهبنا أنا وميس (سحر) وباقي الفصل إلى حديقة الحيوانات .. وها نحن نقترب من قفص الأسد المرعب ..

فجأة يفر الأسد من قفصه ويجري على ميس (سحر) حبيبتي ..

ميس (سحر) مذعورة وتصرخ بصوتها ذو البحة اللذيذة ..

ميس (سحر) خائفة جداً ..

الأسد يقترب منها أكثر وأكثر ..

يظهر فجأة البطل الصغير .. ويمسك الأسد من ذيله ويدور به في الهواء .. الأسد يصدر زئير ضعيف أشبه بمواء القط المذعور ..

الأسد يطير في الهواء ويهبط إلى ما وراء جامعة (القاهرة) ..

ميس (سحر) تلتفت إلى البطل الصغير (أنا) وتطبع قبلة رقيقة على خده كنوع من الشكر والعرفان لإنقاذه لحياتها بهذه الشجاعة الرائعة !

البطل الصغير يطير بجناح خفي إلى ما وراء جامعة (حلوان) .. 


 

  • وائل .. أنا كنت بقول أيه ؟؟
  • هه ؟؟ معلش يا ميس (سحر) ، أصلي سرحت شوية ..


 

(أحم .. أيه اللي جاب الكلام ده هنا ؟؟)


 

في الصف الأول الإعدادي كان لدي مشكلة غريبة جداً في اللغة الإنجليزية ..

مشكلة مع حرف واحد وحيد ..

حرف الـ E !

(كان حرف أبن كلب أوي وبروطة) !!

كنت أجده في معظم الكلمات الإنجليزية بكل صفاقة وبجاحة وسماجة وثقل دم غير معتادة!

المشكلة أنه لا ينطق في معظم الأحيان .. لذلك كنت – أحياناً – أعاند معه وأتجاهله تماماً في الكلمات ..

كادت ميس (سحر) أن تجن مني ..

فمثلاً كلمة True .. أكتبها هكذا : Tru .

و كلمة Peace .. أكتبها هكذا : Peac


 

ميس (سحر) فاض بها الكيل مرة وسألتني في حدة :

  • لماذا لا تكتب الكلمة صحيحة ؟؟

فنظرت لها ببرود وقلت :

  • أنا أكتب ما أشعر به ، وهذا الحرف لا أشعر به في الكلمة إطلاقاً .. فلماذا أكتبه ؟؟
  • عشان دي لغة يا وائل .. ماينفعش نغير في اللغة على مزاجنا ..


 

المكتوب بالأحمر أهديه لكل من يهتم بحصيلته في اللغة الإنجليزية ، وكل من يشعر بالخجل من نفسه عند كتابة كلمة إنجليزية بها حرف ناقص أو حرف خطأ ..

أيضاً يا أخواني اللغة العربية هي لغة ، ولا يصح بأن نغير في اللغة حسب أمزجتنا الشخصية !!

الهمزة هي همزة ..

الياء هي ياء ..

الهاء هي هاء ..

التاء المربوطة هي تاء مربوطة ..

ألف المد هي ألف المد ..

لا يصح أبداً أن نضع كل ما سبق في خلاط عملاق ، ثم (نكبه) في ورقنا وصفحاتنا الالكترونية ..


 

الله يمسيكي بالخير يا ميس (سحر) ..


 

**************


 

لو قلت لك :

  • أزيك ؟؟

حترد تقول أيه ؟؟

  • (كويس الحمد لله ) .


 

طب لو سألتك :

  • يعني أيه بقى (أزيك) دي ؟؟

قبل ما تقول أني غاوي هيافة وسفسطة ودماغي فاضية ورايق !

بجد عايز أعرف أن كنت فاهم أنت بتقول أيه واللا لأ !!

أهي مجرد كلمة بسيطة بنقولها كل شوية للناس ، وبتتقال لنا برضة ..

معناها أيه ؟

مش عارف ؟؟

دعنا نحضر (أزميل) ومطرقة (شاكوش) ونكسر معاً هذه الكلمة الغريبة إلى نصفين ..

(انبطح أرضاً من فضلك ، فقد يصيبك حرف طائش من شظايا هذه الكلمة) !

أيش زيك ؟

هذا هو أصل هذه الكلمة المألوفة على آذاننا والغريبة على عقلنا !

(أيش زيك) هي تحية عند عرب الجزيرة والبدو ، مثلها مثل (أيش لونك) !

وتحورت مع الوقت إلى كلمة (أزيك) !!

وصلت ؟

تعالى هنا رايح فين ؟؟

يعني أيه بقى (كويس) اللي هي الرد بتاع (أزيك) ؟؟

رايح فين تاني ؟؟

حتجيب الأزميل والشاكوش ؟؟

لأ مش لازم .. الكلمة دي سهلة جداً .. مش محتاج العدّة !

(كويس) هي تصغير لكلمة (كيّس) ..

ومعنى (كويس) بالفصحى : (أني أشعر بالكياسة) .. أي في حالة مزاجية وسطية وعادية !


 

المجال مفتوح أمامك الآن .. أحضر أزاميلك وشواكيشك وكسّر غموض كل كلمة مبهمة أمامك ..

وثق تماماً أنك تملك الحق في أن تعي ما تقوله .. وأن تقول ما تعي .


 

بس خلاص !


 

**************


 

يا صباح الجماجم وحاجات بتهاجم ..

صباحه بيكاكي من عند كنتاكي ..

أحنا الشباب ..

أشطة وزي الفل ..

روشين طحن ..

شباب كول .. مش سيس وأي كلام ..

خليك عادي يا مان , أنت منفسن كدة ليه ؟؟ هه ؟؟

ماتأفورش المرمة وخلي الموضوع مستكنيص كدة!

يا أخي الباب اللي يجيلك من الريح ، ماتلحسهوش كله ..

أيه يا بوب ؟ مالك ومال الشباب بس ؟؟

مالها اللغة ؟؟ ما الحوار داير وشغال سخن وبارد ..

عايز تحبكها وخلاص ؟

يا مان خليك عادي ومتبقاش خنيق كدة ..

كدة وبتاع ، والفيل أبو دراع .. والشاي بالنعناع ..

أيوة كدة يا واد .. أضحك

(لول) ..

وفي اللا وادي السندسي ، صانعات عنب يا للالي !


 

**************


 

انتهت (خروشاتي) الفكرية هنا ..

وتمنيت أن أقسو على نفسي أكثر وأكثر كعقاب لي على استهانتي في حق اللغة العربية التي تذبح أمامي في صمت كل لحظة .

كل يوم نقدم تنازلات رخيصة من لغتنا تحت اسم (التحضر) .. كأن مضمون التحضر هو التخلي عن مبادئنا اللغوية والتبرؤ والتملص منها !

أنا لا أدافع عن اللغة العربية لأني أتكلم بها وأكتب بها وأقرأ بها وأحلم بها أيضاً .. أقول هذا لأني أدافع عن طريقة التفاهم بيني وبينكم .. وبينكم أنتم وبينكم !! ولن أسكت لأي محاولة تشوه وسيلة اتصالنا معاً !

ولو ولدت في الصين وفرضت علي اللغة الصينية ، لكنت فعلت نفس الموقف دون نقصان أو تخاذل !


 

وقد عزمت أن يكون هذا أخر موضوع أكتبه عن اللغة .. لأسباب خاصة بي أنا ..


 

بالمناسبة :

من يريد إنعاش ذاكرته عن أصول الإعراب والنحو ، فسيجد في هذا الموقع ضالته وغايته !

ومن أصابه الفضول حول مبتدأ وخبر (كان) ، فيمكنه الاستزادة من هنا ..


 

ألقاكم قريباً في موضوع أحاول جاهداً في منع نفسي من كتابته !

فهو موضوع كفيل بإحالة أوراقي إلى المفتي سبع مرات على التوالي والتوازي !! وتنفيذ حكم الإعدام علي مرتين .. منهم مرة سيتم شنقي من قدماي !! ثم نفيي بعد ذلك إلى بلاد ما بعد الشمس !

(والنبي يا جدعان حد يمنعني ..) !

وائل عمر .

هناك 5 تعليقات:

ayman badr يقول...

احلى سلام لاحلى عرين غضب فى الدنيا كلها
طبعا أنا سعدت جدا باهتمامك بموضوع اللغة العربية وبجد أنا بتعجبنى مدونتك كل يوم اكثر من الذى يسبقه يا وائل
المهم إن شاء الله بما إنى متخصص فى اللغة العربية هنزل دروس للمبتدئين فى اللغة على مدونتى والاخطاء الشائعة وبعض القواعد المبسطة للنحو والصرف من اجل ان يستفيد الناس وبهذا نكون رددنا للغتنا جزءا صغيرا من مكانتها الحقيقية

ملحوظة: كان فعل جامد يبنى على الفتح لا محل له من الإعراب
تحياتى على الموضوع الجميل

maha zein يقول...

بجد يا وائل انت ايه
بجد سيبكمن ان الموضوع احنا عارفين اهميته وفعلا لازم نتعدل بقه
بس بجد
اسلوبك نفسه
سلس اوي
وبرغم طول بوستاتك
الا انها بتتقري
للاخر
وباستمتاع
بجد والله
مش نفاق ابدا
ادايه كلامك رائع
ويا عم انت لا بتسفسط ولا بتتفلسف
فاهمني انت(وش بيستحلف)
انت بجد شخص ينفع يتكلم عن اي موضوع ويناقشه وينصحنا واحنا عشان اتأثرنا بكلامه وبشدة هنعمل بالنصيحة
ووصفك للفرخة والله بجد كان وهمي
قال الفرخة فعلا يبقه سعرها اخلي منها وهي صاحية
وائل انا بجد والله عوزة اقولك اني بحترم دماغك
بغض النظر عن مواضيعك
انت ليك طريقة كده فظيعه
في توصيل الفكرة
ربنا يعزك

هند يقول...

ذكّرني حديثك بإحدى المرات عندما ذهبت إلى أحد مطاعم الوجبات السّريعة المنتشرة. طلبت من البائع مشروب شكلاطة ساخن.
نظر إليّ بعينين جاحظتين ـ ذهولا ربماـ و ردّد !?chocolat chaud
يا عيني !!!

ملحوظة: كان يعرب على أنه فعل ماض ناقص مبني على الفتح

غير معرف يقول...

حقا ياوائل لا اجد شئ اقوله لك الا انك بالفعل تحب وتعشق د.مصطفى محمود ولن اقول ان المحب لمن يحب مطيع ولكن هنا اقول ان المحب لمن يحب شبيه....فهو كان نادر ورائع فى اسلوبه وتفكيرة ...واراك رائع ونادر فى تفكيرك واسلوبك ....R

رقيه المنسى يقول...

مشكله اللغه العربيه
انا من اشد الناس جهل بالقواعد انا مبعرفش اكتب كلمتين على بعض صح
عارفه مشكلتى ومع الاسف مش بحاول اصلحها
بس نيجى لكون اننا بنستخدم لغات تانيه غير العربى
فينا اللى بيتمنظر وفينا اللى غصب عنه بيستخدم لغه اخرى فى التعبير عن نفسه
بس تخيلوا ان العرب اكتر ناس بيتخلوا عن لغتهم بارادتهم
فى فرنسا من شبه المستحيل ان حد يكلمك اى لغه غير الفرنسى
يبقى الشخص فاهم كلامك لكن يرد بالفرنسى ان رد
نوع من الاعتزاز باللغه
اما العرب؟؟؟
نيجى لمشكله تانى وجود مصطلحات غريبه باللغه من اختراعنا بتصعب اللغه على غير متحدثيها فى التعلم
وجدت نفسى فى موقف محرج جدا
واحده لغتها اسبانى وانا لغتى عربى وصلنا لحل وسط للتواصل
الانجليزى كنا بنتكلم انجليزى احنا الاتنين
وبعد كده اتفقنا انها تعلمنى اسبانى واعلمها عربى
كلمات بسيطه فى التعامل اليومى
كانت مهمتها هى سهله
لكن انا اتفاجات هعلمها عربى بالفصحى ولا بالعاميه
اقلها كيف حالك؟
ولا عامل ايه؟
قلتها المصطلحين وقلتها ده فصحى وده عامى
وكل ما نقابل حد كل واحد يستخدم مصطلح مختلف وتسالنى
يعنى ايه ازيك؟
يعنى ايه كيفك؟
وغيره كتير
وفى الاخر اكتفينا بالانجليزى وصرفنا نظر عن تعليم بعض
ده غير المصيبه الاميه فى الانجليزى
اغلب العاملين بشرم وغيرها من المناطق السياحيه بيتكلموا ايطالى وروسى وانجليزى كويس اوى
لكن بيقروا؟
بيكتبوا؟
لا بيتكلموا بس يعنى اميين
اعترف انا منهم
مصيبه مش على المستوى الشخصى
لا على المستوى العربى كله
نسيت اقول حاجه الضوء اسمه ايه لايت
تخيلوا العرب بيجمعوا لايت (لايتات) اقسم بالله سمعتها بنفسى
تسموا ده ايه؟