17‏/3‏/2008

عن المرأة أتكلم (للكبار فقط) !!

من منطلق تفكيري التجريدي الذي تربيت عليه منذ صغري ، وغرابة منطقية الأمور التي تدور في رأسي والتي تجعل البعض يظن أني متشائم .. أو أحمق .. أو قادم إليهم من كوكب أخر!!

وكان من الصعب أن أتبادل أفكاري مع الآخرين !! فدائماً رأيي الشخصي يخالف أرائهم مجتمعة !!

مثلاً :

كنت مع أصدقائي في رحلة استجمام على أحد شواطئ قرى (العين السخنة) الفاخرة .. كنا نسهر على الشاطئ قبيل مطلع الفجر .. كنا حوالي ستة أصدقاء بما فيهم أنا .. استلقينا على الرمال وبدأنا نتأمل السماء الساحرة .. بسوادها ونجومها وقمرها المحاق ..

كنا ستة .. وسابعنا الصمت !!

فجأة سأل أحد أصدقائي بعد أن انتشى من منظر السماء فوقنا :

- تفتكروا إيه هو أعظم اختراع بالنسبة لكم ؟؟

بدأ الأصدقاء يفكرون في إجابة السؤال ، في حين رددت أنا في سرعة كأني متوقع السؤال :

- الفانلة الداخلية .

قلتها وأنا أشبك أصابع يدي تحت رأسي في الرمال ، وأنظر إلى النجوم في رومانسية ساذجة .. وقطع علي شرودي إحساسي بعشرة عيون تتركز علي في آن واحد في استغراب حقيقي !!

- الفانلة الداخلية ؟؟ بقولك أعظم اختراع بالنسبة لك ! تقول أنت الفانلة الداخلية ؟؟ أنا فهمت دلوقتي أنت مركز مع السما أوي كدة ليه ! أنت أكيد بتدور على سفينة الفضاء اللي حتاخدك للكوكب بتاعك .. صح ؟

- أنت مش سألت عن أعظم اختراع بالنسبة لي ؟

- أيوة .. بس مش قصدي الفانلة الداخلية يعني .. عندك العربيات .. الموبايلات .. يأخي كان ممكن تقول آلة حاسبة .. إنما الفانلة الداخلية يا وائل ؟؟

قمت من سريري الرملي وجلست أمامهم لأواجه تلك المحاكمة الدائرة بعيونهم .. وبدأت شرح وجهة نظري :

- الفانلة الداخلية شيء أساسي بالنسبة لي .. طبعاً أنا عارف إنها فكرة غريبة بالنسبة لكم .. بس فعلاً أنا حاسس بكدة !!

أولاً : أنا درجة حرارة جسمي زائدة عن المعدل الطبيعي بدرجة أو درجتين ، يعني في كل الأحوال أنا جسمي دافئ .. عشان كدة لما أكون عيان أو جالي سخونية .. درجة حرارتي بترجع للمعدل العادي في خلال ساعتين بس .. ومن غير أدوية كمان !!

ولو يوم قررت أني أخرج من غيرها أو حتى أنام من غيرها .. على طول يجيلي سخونية ..

غير إنها معايا على طول .. بس مش بحس بيها .. بستريح أوي وأنا معاها .. حاسس فعلاً بقيمتها عندي .. يمكن بحس بامتنان ليها .. ده اللي عندي .. اللي مش عايز يقتنع .. براحته !

صمت ..

قال صديقي السائل :

- وائل .. بجد .. أرجع نام مكانك .. وحاول تدور بجهد عن سفينة الفضاء .. زمانهم قلقوا عليك يا ابني !!!

************************************

هنا سأتكلم عن المرأة !

من منظوري أنا ..

ذلك المخلوق الغريب بالنسبة لي ..

والذي قامت من أجله أعتى الحروب .. وخرت على قدميها أعظم العظماء .. وقضي كثيرون نحبهم من أجل ابتسامة منهن .. وجن الملايين من مجرد نظرة واحدة من عينيهن !!

ما هي الأنثى يا ترى ؟؟

لماذا الأنثى ؟؟

كيف تفكر الأنثى ؟؟

************************************

سألت واحدة معجبة بكتابات فيلسوف مشهور :

- أنا مبهورة يا سيدي .. كيف استطعت أن تعبر عن تفكير المرأة بكل البراعة والصدق ؟؟ كيف وصلت إلى أعمق مجاهل المرأة ببساطة ؟؟ كيف استطعت أن تختصر كل النساء بكلمات ؟؟ أني أشعر بأني بطلة كل كتاباتك .. كيف يا سيدي ؟؟ كيف ؟!!

- المسألة بسيطة جداً يا عزيزتي .. فأني عندما أريد أن أكتب بلسان المرأة .. فأني ببساطة أستحضر رجل في مخيلتي .. أي رجل .. وأزيل منه المنطق .. ثم المسئولية .. فيتبقى لي المرأة !!


(!!!!!!!!!!!!!!!)

************************************

في طفولتي لم أحبذ التعامل مع الأنثى .. سواء في المدرسة أو المعهد ! كنت أتجنبهم تماماً وأتهمهم بأنهم (كائنات خرقاء معدومات التفكير ولم يصلن بعد مستوى تفكير دجاجة) .. لا أخفي مراقبتي لهن من حين لأخر بحكم الغريزة .. لكني لم أحاول أبداً التقرب لهن بأي شكل من الأشكال ..

ذات مرة سألني زميل لي في المعهد :

- أنت ناوي تتجوز أمتى إن شاء الله يا وائل ؟

نظرت له بامتعاض وقرف وقلت :

- أنا لا أقبل أن أكون مجرد وسيلة بيولوجية لاستمرار الحياة .. جواز أيه وكلام فارغ أيه يا راجل ؟

وبعدها بيومين جاءت فتاة تسألني في جراءة :

- ممكن أتعرف عليك ؟

- أفندم ؟

- مش أنت وائل بتاع البيولوجي ؟

- أفندم ؟؟

- أصل أنا عجبني دماغك .. غرابة تفكيرك يعني وكدة .. فحبيت أقرب منك أكتر ؟؟ أيه رأيك أعزمك على شاي في الكافيتيريا ؟؟

- أفندم ؟؟؟؟؟؟؟؟

(!!!!!!!!!!!!!!!)

************************************

من خلال مراقبتي للأنثى في الحياة العامة .. وجدت فيها أشياء غريبة للغاية .. لا أدري إن كان شعر بها أحد غيري أم لا !! ولكني سأذكرها هنا بدون تكلف أو حرج :

- الكعب العالي .. لاحظت أن من يلبسن أحذية ذو كعب عالي أن صدورهن ومؤخراتهن تبدو أكبر من الحجم المعتاد !! فاندهشت كثيراً ! وقررت أن أعرف السر في ذلك !! وعرفته .. وهو ببساطة أن الكعب العالي يجبر الجسم على الارتفاع حوالي 7 سم من ناحية الكعب .. ولكي تعوض المرأة هذا الخلل عليها أن تميل نصفها الأسفل إلى الوراء .. ونصفها الأعلى إلى الأمام !!! إن لم تصدقني .. قف على أصابع قدمك ولاحظ النتيجة ..

فلا عجب إذن أن مخترع الكعب العالي رجل .. يريد أن يعذب المرأة .. وفي نفس الوقت يريد أن يمتع عينيه !!!




- أدوات التزيين (الميك أب) .. لم أفهم يوماً لماذا تضع الأنثى مساحيق التجميل !! لماذا تضع طلاء على يديها ؟ ومادة كريهة الطعم على شفتيها (لي مغامرات في أكل أصابع الروج في طفولتي) !! وبودرة على وجنتيها ؟ ومادة لزجة على جفونها ؟ وأشياء غريبة ومكلفة لشعرها ..

المرأة جميلة .. وناعمة .. دون أن تفعل شيئاً .. فلن ينافس المرأة مخلوق أخر في عين الرجل .. لا شيء غير الأنثى نفسها ..

وقرأت من قبل أن نوع من القردة تقوم الإناث الغير بالغات فيه بالتمسح في صدور أمهاتهم بعزم .. وينتج عن ذلك التصاق مادة تخرج من صدور إناث القردة البالغة لتستقر في الإناث الصغيرة .. فيكون النتيجة أن تتوجه أنظار القردة الذكور البالغة إلى الإناث (القاصرة) .. وتبدأ قصص الغزل والصراعات بين الذكور للفوز بقلب تلك القردة الجديدة !!

ربما هذا ما يفسر ابتسامتي الغامضة عند رؤيتي لأنثى (بشرية) تمشي في الشارع وتضع مساحيق التجميل .. فعلاً هي نعمة أن لا يعرف الأخريين ما أفكر فيه !!




- تصرخ الأنثى عندنا وتملاً الدنيا هلعاً وذعراً لمجرد رؤيتها لصرصور أو فأر مر بجوارها صدفة !! واستغرب كثيراً لهذا !! هل الأنثى فعلاً بهذه الرقة والوداعة ؟؟

واندهشت كثيراً !!

كيف لمخلوق يتحمل أن يضع (شمع ساخن) على جسمه ثم ينتزعه بسرعة ويتحمل ذلك الألم الرهيب الناتج عنه في رضا .. في حين أني شخصياً أعاني من نزع مجرد قطعة (بلاستر طبي) فوق جرحي وأملأ الدنيا صراخاً ولعنات !!

قالت لي صديقة من قبل إن الرجال كائنات مات لديها الإحساس منذ زمن !! فقلت : وهل تعرفون أنتم نصف آلامنا ؟؟ كم فتاة منكن لديها جروحاً في ركبتها وكوعها من الطفولة .. كم فتاة لديها مثلي تسع (غرز) في رأسها مثلي تذكار لشقاوة الطفولة ؟؟ أنتن لا تشعرن بالألم مطلقاً !! حتى أثناء الولادة ، تملأن الدنيا صراخاً وولولات حتى وأنتن تحت تأثير (البنج) القوي ! فماذا تعرفن عن الألم ؟؟

ردت في دهشة : بنج أية يابني ؟؟ أنت عبيط ؟؟ الولادة بتكون من غير بنج !

رددت وقد غزتني قشعريرة : أيه ؟؟ الولادة من غير بنج ؟؟ إزاي ؟؟ معقول ؟؟ وأنتوا عارفين كدة ؟

قالت في فخر: طبعاً .. عشان تعرفوا إحنا بنستحمل قد أيه !

قلت : ولسة عايزين تتجوزوا ؟؟ جاتكم وكسة !! من غير بنج ؟؟ يا نهار أسود !!

(لازلت أندهش عندما تصرخ الأنثى لمجرد رؤيتها صرصور !!!!!!!!!!!!!!!!!!)




- نعم أيها السادة .. أنا أعلن فشلي التام لفهم الأنثى .. هل رقيقة وناعمة مثل الوردة ؟؟ أم ناعمة وملساء مثل أفعى الصل ؟ أم غادرة وهادرة مثل أمواج البحر ؟؟ أم هي حانية ودافئة مثل (فانلتي الداخلية) ؟؟ أم هي مجرد أنثى وخلاص ؟؟

************************************

قلت لها : أحبك !

قالت : يرحمكم الله !!

************************************


قلت لأخرى : أحبك !

قالت : شكراً !!

************************************

سأل أحدهم : يا ترى ما هو أصغر كتاب في تاريخ البشرية ؟؟

وكانت الإجابة : بالطبع كتاب اسمه (ما يعرفه الرجال عن النساء) !!!

************************************

تجسد الشيطان لحواء في الجنة ، ووسوس لها بأن تأكل من الشجرة !!

فقالت له : أذهب من هنا يا ملعون ، أتريدني أن أعصي ربي وزوجي ؟؟

لم ييأس الشيطان .. فتجسد لها مرة أخرى .. وقال لها : يا حواء ، إذا أكلتي من هذه الشجرة ، ستصبحين أكثر جمالاً في عين زوجك !

قالت له : يا أحمق .. لست في حاجة لذلك .. فليس لديه سواي .. ولا يوجد هنا سواي !!

فضحك وقال: بل يوجد غيرك !! وإذا لم تصدقي ، تعالي معي لأريك !

فذهبت حواء معه وفي صدرها غيرة وليدة .. فاصطحبها أبليس إلى تل في الجنة حيث يوجد بئر .. فأشار إليها وقال :

- عرفت أنه يخبئها منك هنا .. أنظري هنا وستجدينها !

فنظرت حواء في البئر .. فرأت امرأة جميلة جداً .. فثارت غيرتها .. وأكلت من الشجرة !!!!!!!!

************************************

على الرغم من ذلك ..

لازالوا يقولون بأن الشيطان أستاذ الرجل .. وتلميذ المرأة ..

************************************

للموضوع بقية !!

هناك 17 تعليقًا:

maha zein يقول...

بردو مش عرفة اعلق ولا لأ بس عموما هعلق
بص بقه انا خلاص عرفتك يعني ومش محتاجة اقولك يعني ابقه خلي بالك شوية في كلماتك...يعني منعا للاحراج والكلام ده
هعتبر دلوقت نفسي يعني وحدة نوية تعلق اوك
بص بقه يا عم في البداية انت عمال تقول وحدة بتقولي نعم يا سيدي و أنا مبهورة يا سيدي وحركات...بقولك ايه يا جدع انت من كام بوست عمال تقول سيد دي يعني ايه وعبيد وكده...يعني خلاص بقيت مسمي نفسك سيدي دلووقت والبنية بقه العبد...لا يا عم وائل عوزين بقه حيادية.
بعدين مفيش فرق للمونيكير والاكلادور ده ناس بتقولها كده وناس بتقولها كده عادي يعني وهو في النهاية اسمه بوهية عربيات ولا دوكو الله اعلم
بعدين بقه في صيغة كلامك حكم علي النساء جميعا...طب هدي اللعب شوية ....ومتجمعش لان انا صراحة بعتبر ان قلة قليلة هي الي ممكن تتنيل ينطبق عليها وصفك ده...وبردو قلة قليلة ممكن تقولك "عمو وائل ممكن اعزمك علي كوباية عصير قصب "
مع ان الناس بتقولي انتي عبيطة يا بنتي ده البنات بقت عوزة ضرب النار وبتعمل حركات منيلة...لازلت لا اصدق لاني رأيت بعيني القليل صراحة
بعدين بقه بالنسبة للصرصار...في دي عوزة اقولك ان نص البنات الي بتصوت بتستهبل وبتمثل وانا عن نفسي ببقه عوزة اديهم بالبوكس في وشهم
انا مش شريرة بس انا ممكن الي يخوفني يعني برص....ضفدعة..دودة....تلاقيني ممكن اموت لو شفتهم...مش صرصار ونملة ودبانة بلا ارف...دي بنات ميصة الي بتعمل كده...بس ده ميمنعش ان في بنات فعلا بتخاف بجد وهما قلة قليلة
بعدين بقه بالنسبة للالم ...يعني ايه يا وائل مش بنحس بالالم...احنا اكتر منكم احساسا بالالم وربنا خالقنا اكثر منكم تحملا للالم ودي حقيقة ...هحكيلك
لما ربنا خلق سيدنا ادم ...اراد انه يخلقله شخص اخر يكون معاه فأختار ان يخلق الشخص ده من ضلع سيدنا ادم...وعشان ربنا عارف انه لو خلق ستنا حواء مكن ضلع ادم وهو صاحي فده هيسبب له ألم وفي الحالة دي ربنا كان عارف بردو انه بسبب الالم ادم هيكره حواء ...فخلا ادم ينام ووهو نايم خلق حواء ولما صحي ادم لقا ستنا حواء بجانبه فحبها ومكرهاش...تمام...طيب
ندخل علي حواء...تفتكر بقه ليه ربنا بيخلي حواء تولد وهو صحية وحسة بكل شىء بل بالعكس صحيانها ده هو الي بيساعدها انها تولد ولو مكنتش صحية في الحالة دي العملية بتكون قيصري وعملية ومشارط وحقن....طيب عارف ليه ربنا بيخليها تولد وهي صحية...لانه عارف انها مهما حست بالالم الفظيع ده عمرها ما هتكره ابنها ولا جوزها الي يعتبر رما عليها الحمل لوحدها في اللحظة دي...بل بالعكس هتحب ابنها ده بشدة لانها تعبت فيه....تعرف ان الالم الي بتتكلم عليه ده ...بتكون في لحظة الولادة روح الست متعلقة بين السما والارض ...يعني معرضة للموت الحقيقي...لان انت مش متخيل كمية الالم الي ممكن وحدة تتحملها عشان تنجب طفل للحياه...عشان تسعد جوزها بعزوة...وبتظل رغم التعب تخلف وتخلف..والميزة انها سبحان الله بتنسي التعب ده وبتخلف تاني...تفتكر فيه ولد ممكن يتحمل ده...تفتكر اصلا فيه ولد يتعرضص لنصف التعب ده وينسي...لا لانكم قلبكم اسود بجد ومش بتنسوا....شوف اديك زعلت لما قلت قلبك اسود...لا متزعلوش ...بس بردو يا وائل بص للنص المليان من الكوباية....ذي ما علمتني...فيه ستات بنوا الحياه...اوفياء....ستات بميت راجل ربت عيالها وعاشت عليهم...وفيه بنات اكثر احتراما مما تتخيل...في بنات لحد الان بتمشي مكشرة في الشارع ورفعة حواجبها عشان متجرأش حد يبصلها ويعاكسها...فيه بنات بيتقال عليهم معقدين من كتر ما بتحافظ علي نفسها...في بنات لقت ان الولاد دلوقت بقم يحبوا ويرتبطوا بالبنات الي بتصوت من الصرصار وبتقول "اليو"في التليفون وبتتدلع وتقول للولد تعال اعزمك علي سم هاري
فهمتني ...يعني انا في اعتقادي ان البنت دي حاجة حلوة اوي اوي...تتمني تلاقي حد يحبها ويقلها اعملي عشان تعمل وتسمع الكلام وبتكون سعيدة وراضية
قال تقولي افعي حلزونية...وعقربة صحراوية....يا سم يا دم
يا شرير
يا ابو عشر غرز في وشك
يا ابو فلنة بحملات
بس بقه

عرين الغضب يقول...

من أمتى السما بقت بتمطر رصاص ودبش ؟؟!!

يا مها يا زين البنات ..

حلاقيها منك واللا من صحابي ؟؟

بقى أنا عمال أتكلم عن (هي) بكل جوارحي ومن أعمق أعاميقي ..
حتى لما أتخيلت نفسي أب ، كان المولود بنت !!

واعترفت بصراحة إن لولا هي .. ماكنتش أنا هنا أساساً ..
كان زماني واقف على ناصية شارعنا بوزع نظرات القرف لكل أنثى معدية في الشارع !!

يا مها ..

أنا عرفت إن فيه بنات (نضيفة) ..

نضيفة يا مها ..

زيك .. وزي آيار .. وحدوتة .. ونبيلة .. و(هي) .. وبنات كتير ..
وزي كل بنت ماشية في الشارع محترمة ومحافظة على نفسها من نظرات ولسان الرجالة الوحشين ..

يبقى إزاي أنا أجمع كل النساء في موضوع واحد ؟؟

إزاي أعرف أتكلم عن الوردة والشوكة في نفس الوقت ؟؟

إزاي أعبر عن الندى والفيضان في نفس الوقت ؟؟

مين عرف يوصف اللون الأبيض وهو مغمض عيونه ؟؟

مين اللي يقدر يتكلم عن الأمان وهو شايل مدفع ؟؟

أنا بتكلم عن الوحشين يا مها ..

بتكلم عن الزائفين يا مها ..

بتكلم عن كل واحدة مش واثقة في نفسها .. ولا واثقة في المراية .. بل بتثق في نظرات الشباب عليها وهي ماشية في الشارع ..

بتكلم عن كل واحدة بتتكلم مع الناس بنفس طريقة ودلع شويكار .. إنما في البيت ممكن تفرش الملاية لمامتها عشان طلبت منها تغسل المواعين ..

بتكلم عن بقعة سودة صغننة في لوحة بيضاء جميلة أسمها الأنثى ..


أنا كنت ببص على جزء صغير من إجمالي الأنثى .. إنما الأنثى بير غويط يا مها مالهوش أخر .. عايز واحد بيعرف يعوم ..

وأنا عارف إن الأنثى لما بتصرخ في الولادة .. بيكون همها الأساسي على البيبي وسلامته .. وعمري ما سمعت واحدة تحت تأثير ألم الولادة بتقول : خلاص مش عايزة أولد .. أنا زهقت من الولادة خلاص .. عايزة أروح !!

البنات مش عايزة ضرب النار يا مها ..
البنات عايزه واحد بيفهم ..
واحد حنين ..

أنا كنت كاتب إن للموضوع بقية .. وكانت البقية عبارة عن الأنثى ..

اللي زيك ..
الأنثى النضيفة ..
بكل ما فيها من سحر .. وحنان .. ومسئولية ..

كنت ناوي البوست اللي جاي أعوم في بئر الأنوثة .. أبحث عن الكنور المستخبية ..

وكان فيه بوست تالت عن الراجل ..

أحنا يا مها ..

كنت حكتب العيوب ..
كنت حكتب عن الوحشين فينا بيفكروا إزاي ..

وبعده كنت حكتب عن الكويسين فينا برضه بيفكروا إزاي ..


منك لله بقى يا مها .. بوظتي الموضوع خلاص ..

بس برضه حكتبه .. وحغوص ..

بالنسبة للألفاظ .. أنا فاهم تماماً أنا كاتب أيه !!

وعارف كل واحد ممكن يقرأ كلامي حيقول أيه ..
ده كدة حلو قوي ..


بعدين يا مها أنا قايل الموضوع للكبار فقط .. أيه اللي جابك هنا ؟؟

أه .. صحيح !!
ده أنتي كبيرة عندي صح ..

(مش معقول بقى كل مرة أرد على موضوع ليا .. أكتب الرد أكبر من الموضوع .. أنا جالي صداع في صوابعي )

بس برضه على قلبي زي العسل ..

تحياتي يا مها ..
يا عاقلة ..
يا نضيفة ..


وائل عمر !

محمود يقول...

بقى الست لما تحط مكياج تبقى عاملة زى القردة لما تتمسح فى امها الله يقرفك ياشيخ
انت فكرتنى بلقطة فى فيلم جرى الوحوش
لما البنت اللى اتجوزها نور الشريف كانت معقدة كدة وبتوصف كل حاجة من المنظور العلمى فوصفت القبلة على انها عبارة عن افرازات حمضية مابين الرجل والست
لدرجة انها خلتنى قرفت من مراتى وبعدين انت جاى توقلى قردة الله يخرب بيتك ياشيخ
يعنى افرازات حمضية وقردة ياراجل روح اشترليك طقم فلانات بدل اللى عندك دول
ولا اقولك انا هشترليك على حسابى علشان تبطل تخرب كل حاجة حلوة
يابتاع الافرازات
الله يقرفك

عرين الغضب يقول...

يووووووووووووووووووه !
يا محمود ..
أنا متأكد أني كاتب الموضوع بالعربي !!
بس عامة أنا حرد على كلامك بطريقة أسهل :
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟



فهمت يا محمود؟؟

محمود يقول...

لية هو انت شايفنى كاتب بالعبرى ولااية
يابتاع الفلنة انت صحيح هقول اية
اقولك بما ان انت بتجب الفلنة الداخلية اقوى كدة وبتكره الحريم اوقوى كدة
فاكر فيلم كيد العوالم لما محمود حميدة كان لابس الفلنة الداخلية حبيبتك وفى ميدان التحرير وعمال يقول اانا حسس وحسسس انا انا اللى ججننت النسوان انت بئة
اوقف فى ابو شاهين بالفلنة الزقا بتعتك وقول انا شوقشئ وشوقشئ انا انا اللى ججننت النسوان
ههههههههههههههههههههههههههههههههههههههههه
يا بتاع الافرازات والله ماشية عليك موت

عرين الغضب يقول...

محمود ..
أنا عارف أنك موجود بعد مني بحوالي 5 مكاتب ..

أوكي ..
حاجة جميلة أننا نهزر مع بعض في الشغل ..

بس هنا لأ يا محمود !!

عرين الغضب هو عالمي الخاص .. ولن أسمح أبداً أن يعكر أي شخص صفو عالمي الخاص ..

أي شخص ..

وجهت لك في الموضوع السابق كارت أصفر ..

وعلي أن أخبرك يا عزيزي أن لون الكارت بدأ في الأحمرار ..

لذلك عليك أن تنتقي ردودك يا زميلي العزيز ..

سأعتبر الرد السابق هو أخر تجاوز هنا ..

تحياتي ..

ayar يقول...

انا رأيي ان المرأة بشر .. ولكل بشر مميزات وعيوب .. والمميزات والعيوب دى بتختلف من شخص ( او شخصة ) للتانى او التانية .. ومفيش انسان كامل يعنى حتى البنات المحترمين اوى ليهم عيوب ,وحتى البنات الوحشين اوى ليهم مميزات .. الامور دى كلها نسبية ..
وائل هو ايه علاقة نص البوست الاول بالنص التانى ...يعنى ايه علاقة الفانلة بالمرأة ؟! موصلتنيش دى ..

عرين الغضب يقول...

سؤالك كويس يا آيار ..

لما كنت بتكلم في النصف الأول من الموضوع .. اتكلمت عن حاجة عادية جداً !!
مجرد فانلة داخلية !
لكن كل من حولي استهجن فكرتي ، وشكك بعقليتي !!

فانلة داخلية !!

أنا حسيت بيها .. واتكلمت عليها .. حقي طبعاً ..

ممكن حد غيري ما أخدش باله منها !!!
بس أنا فكرت فيها ..

نفس الكلام عن الأنثى ..

أنا فكرت فيها من منطلق تاني ..
غير مألوف شوية !!


وواضح طبعاً اختلاف وجهات النظر حتى في الردود هنا .. شوفي مثلاً (مها زين) كانت بتقول أيه .. وشوفي (محمود) بيقول أيه .. (وشوفي ردك) أنتي يا (آيار) ..

ولو رد ألف واحد تاني .. حيكون فيه ألف وجهة نظر مختلفة ..

مش عيب أبداً أني أتكلم عن الفانلة الداخلية .. دي حاجة أنا حاسس بيها ..
وبتعب من غيرها ..
واتكلمت عليها بدون خدش حياء لأي أحد ..

بالنسبة للأنثى :
زي ما أنا رديت على (مها زين)وقلت أني مش حعرف أوصف الأنثى كإجمالي .. ومفيش حد حيعرف أساساً يوصف !!

وفيه جزأ تاني من الموضوع .. حيكون عن الوجه الأخر للأنثى ..

أتمنى يا آيار أن نجحت في توصيل ما بداخلي ..

(ملحوظة قاسية) :

يوجد فرق واحد بين الأنثى والفانلة الداخلية :
إذا أصاب فانلتي الداخلية بقعة متسخة، فبقليل من الجهد ومساحيق الغسيل تعود نظيفة مرة أخرى ..

أما إذا أصاب الأنثى بقعة متسخة صغيرة ، فلن تكفي كل مساحيق الغسيل والتجميل في العالم عن إزالة هذه البقعة ..
أبدا ..

Hadota .. حـدوتة يقول...

المرأة هي الكائن الاجمل على وجه الارض
الكائن الاحن
الكائن الاكث رقة وداعة
المرأة هى المستودع
هي السكن
المرأة هى المرأة بكل ما تحمله شخصيتها من متناقضات جميلة فقط اذا اعطاها الرجل : الحب والامان والثقة والدفء


دا ردى على انك مش فاهم المرأة

غير كده البوست حلو .. ومنتظرين البقية اللى انت قلت عليها


تحياتى

عرين الغضب يقول...

وسع وسع أنت وهو ..

حدوتة هانم وصلت بعد غياب !!

بتقولي يا حدوتة :
(لمرأة هي الكائن الاجمل على وجه الارض) ..

ياترى لو خلينا وردة تتكلم عن الورود كلها .. حتقول أيه يا ترى ؟؟

ولو خلينا غزالة تتكلم عن كل الغزلان .. حتقول أيه ؟؟

ولو خلينا أنثى تتكلم عن كل الإناث حتقول أيه ؟؟

(المرأة هي الكائن الاجمل على وجه الارض ؟؟)

شيء طبيعي طبعاً يا حدوتة تقولي كدة .. وشيء أجمل أنك واثقة في الأغلبية العظمة للأنثى .. أنتي هنا بصيتي ورا اللي قدامي أنا ..

زي ما عملت (مها زين) و(آيار) ..

بدون تناقضات مني ..

وببساطة شديدة ..

في هذا الموضوع (أنا بصيت قدام اللي ورا الكيان الأنثوي !!)
ودعيني أكرر (ليس كله)

وفي تكملة الموضوع أنا (أنا حبص ورا اللي قدام الكيان الأنثوي أيضاً) ..


على فكرة الموضوع كدة بقى صعب بالنسبة لي ..

مش عارف حاسس إن حيجي يوم ويطاردني أعضاء حزب المرأة بالمشاعل النارية ، ويطالبون بحز رأسي لاعتباري (عدو الأنوثة) و (مشوه الجمال) و (سفاح نون النسوة) و(مناهض البروستروجين) و(قاتل النعومة) ..

وليس ببعيد أن تفلس كبرى شركات مستحضرات التجميل بسبب عزوف الإناث عن استعمال (الوسائل التنكرية) التي تستخدمها في صيد الجنس الخشن الأبله المسمى (الرجل) ، خصوصاً وقد بدأ الرجال بمقارنة الأنثى المكثرة من وضع مستحضرات التجميل (يعني الوسائل التنكري) بإناث القرد !!

واحتمال أن تذيع قناة (الجزيرة الوثائقية) برنامج كامل وافي لشرح الفرق بين (الإكلادور والروج) !!

ربنا يوفقني في الموضوع اللي جاي ..

ويارب مايكونش في حزب اسمه (حزب المرأة) .. كفاية علينا (حزب الوفد) ..

بالمناسبة بقى :

أنا كان نفسي أشوف (نانسي عجرم) وهي خارجة من تحت الدش أو من طالعة من البحر ..
ووالله مش عشان سبب خبيث ولا حاجة ..

أنا عايز أشوف خلقتها من غير أدوات التنكر اللي بتحطها .. بعد ما عملت عمليات تجميل و بقت (مصنع سليكون متحرك) ..
وعشان أخلي كل الشباب الأهطل اللي حيموت عليها .. والبنات الهبلة اللي بتحاول تقلدها ..
وأشاور عليها وأقول :

أهي .. هي دي نانسي عجرم .. والجدع يطلع 5 اختلافات بينها وبين أنثى القرد اللي كتبت عنها !!!

وعلى فكرة بقى ..

نانسي عجرم مش مبسوطة ولا حاجة ..
نانسي عجرم زعلانة من جواها ..
نانسي عجرم مضلمة جداً نفسياً ..

أدعوا لها يا بنات إن ربنا يهديها على نفسها !!
أدعوا لها ترجع أنثى (نضيفة) تاني!

هند يقول...

أنا سؤالي خارح عن الموضوع شيئا ما...ما هو "الإكلادور"؟. أعذرني ، ثقافتي اللغوية محدودة :-)

عرين الغضب يقول...

هند !!
فينك من زمان ؟؟
******************************

جاءنا أيها الأعزاء استفساراً من الأستاذة / هند .. تستعلم فيه عن ما مكنون الشيء الغامض المسمى (الإكلادور) ..

ويتفضل علينا الأستاذ / وائل عمر .. العالم الكبير في (عرين الغضب) .. وهو المسئول المختص عن إجابة أسئلة المنطق والأمور المبهمة ..

فلتفضل بالإجابة ..
_____________


سا الفل عليكم أجمعين ..

بخصوص السؤال عن (الإكلادور) .. يسعدني أن يكون جوابي شافياً وعافياً لنفسكم .. كافياً ونافياً لكل جهالة ..

إشطة عليه ..


بالنسبة للشيء المسمى (الإكلادور) هذا .. فهو مادة تضعها أنثى الإنسان (ليس كلهن بالطبع) على حوافرهن .. وعند الإنسان يطلقون على الحافر اسم (ظفر) ، وجمعها (أظافر) وهي تقريباً على نفس وزن (حوافر) ..
هذه المادة لها ملمس لزج كريه للغاية .. إن شئنا الدقة فهو مقرف ومثير للاشمئزاز .. رائحته نفاذة للغاية ومعروفة لدى الجميع بلا استثناء .. أكثر ما يميز هذه المادة هو لونها .. فهو واضح للغاية ويبرز مخالب الأنثى .. أقصد أظافر الأنثى بكل وضوح ..
عندما تضع الأنثى هذه المادة .. فليس معنى ذلك إنها مستعدة للخروج للحرب أو القتال .. بالعكس .. فهذه علامة مميزة عندهم للتعبير عن استعداد الأنثى الأيضي للتزاوج ..
ولا تحتاج الأنثى إلى أي خبرات في علم (النقاشة ) كي تضع هذه المادة .. بل هي فطرة لديها .. ومستعدة لقضاء 3 ساعات كاملة بلا حراك حتى تضع هذه المادة .. وأيضاً لتجف تماماً على حوافرها .. أقصد أظافرها ..

وتباع هذه المادة في حاويات زجاجية صغيرة عندهم في أكشاك دوائية يطلقون عليها (صيدلية) !! وأيضاً تباع في محلات متخصصة لبيع تلك المنتجات مخصوص (هل تصدقون هذا ؟؟)
ووصل إلى علمي أن هذه المادة تباع علناً ودون أي شهادات ضمان على الإطلاق !!!
وتتوافر لديهن هذه المادة بعدة ألوان مختلفة .. ابرزها اللون الأحمر .. والوردي .. والأسود ..

لم يعرف حتى الآن شعور الأنثى بعد وضع هذه المادة .. وهل تؤثر هذه المادة على الجاذبية الأرضية لديهم أم لا ؟؟

بقى أن أذكر أن الأسم الأكثر شهرة لهذه المادة هو : ( مونوكير) !!


وتوجد مادة مضادة له تستخدم في إزالته في ثواني .. هذه المادة اسمها (أسيتون) .. مادة طيارة سريعة التبخر .. خفيفة القوام (عكس المادة الأخرى) .. ولها رائحة ملعونة !!


هذا ما لدينا حتى الآن بالنسبة للمادة المذكورة في سؤالك ..
أتمنى أن أكون وفقت في الإجابة !!

مع تحيات :
القسم المنطقي لمؤسسة (عرين الغضب)

وائل عمر ..

إعلان :
قريباً سيتوفر لدينا أقسام أخرى في المؤسسة :
القسم التاريخي ..
القسم السياسي ..
القسم العاطفي ..
القسم السياسي المعارض ..
القسم العام ..
القسم الغاضب ..

ونحن نرحب بأي استفسار لدى زوار مؤسسة (عرين الغضب) ..

تقبلوا تحياتي ..
وائل عمر ..

kemo يقول...

ديه اول زياره لمدونتك الموقره بالنسبه ليا وبالرغم من انى مش متفق معاك فى معظم افكارك اللى فى البوست بس عجبنى جراتك فى الكتابه عن البنات والستات بس ياريت تحاول تنقى الفاظك شويه بلاش الوصف الزياده ده (خير الكلام ما قل ودل )وحاجه حلوه عجبنى هى ردودك على زوارك كل واحد حسب عقله.... يا ريت تخدنى على قد عقلى

عرين الغضب يقول...

عزيزي كيمو ..

شيء طبيعي أننا ما نتفقش في معظم الأفكار .. ويمكن دي حاجة من أجمل الحاجات اللي في الدنيا !! إن أفكار كل واحد غير التاني ..

ولتاني مرة يا كيمو : انا كاتب على الموضوع (للكبار فقط) .. يعني إشارة واضحة وصريحة عن مكنون محتوى الموضوع ..
وإن لم أذكر كلمة واحدة بذيئة هنا .. بل هي مسلمات موجوده في عاداتنا نحب البعد عنها !!

يا راجل دي البنات دخلت وعلقت من غير كسوف ..
حتى مها زين اللي لما حد يقول لها (صباح الخير) بتبص في الأرض ووشها يحمر من الكسوف .. دخلت علقت على الموضوع :)


ممكن يا كيمو تشوف الموضوع طويل .. بس أن شايفه عادي .. (اختلاف آراء بقى يا مان والحركات دي ) ..

واوعى تقول تاني اني باخد كل واحد على قد عقله يا بوب .. انت عايز صاحبتك مها زين تيجي تولع فيا وفي عرين الغضب ؟

انا بس بحب افضفض مع اللي كتب تعليق .. وأحياناً كثيرة بيكون تعليقي مكمل للبوست نفسه ..

كيمو بيه ..

شرفت عرين الغضب يا فندم ..

تحياتي .
وائل عمر

غير معرف يقول...

هى بحر هادى يحميك ويوصلك للبر لما تكون غرقان وموج قوى يطردك ويعاقبك لما تكون غلطان هى ارق من النجوم بتلنع (المكياج والنعومه )ولكن مش علشان هيا فى السما علشان هى نجمه منوره فى حياه الى بتحبه هى ارق من الفراشه اللى بتدور على ورده تاخد رحيقها لانها بتدى ومبتاخدش هى اعظم مخلوقات الله هى الام والزوجه والحبيه هى مش حجاب ولا مكياج ولاكلام فارغ هى انثى (ورده)تحتاج من برعاها ومين اللى بتدور عليه الورده كل ماتصحى من النوم الشمس لانها بتحميها انت فاهمنى يارب تكون فاهمنى الانثى مش معقده اوى كده الرجل هو اللى بظلمها لما مبيفهماش الموضوع جميل ويارب كل واحد يكون فاهم المراه زيك كدهالمراه مش مخلوق ضعيف زى ماكل راجل فاهم المره اقوى مخلوقات الله بدليل ان ربنا خلق حوا من ضلع ادم علشان تكون معاه ونيس ولكن كل ادم وحوا اتخلقوا من مين بعد كده من حوا اللى ربنا اختارها علشان تربى ادم وحوا اختارها علشان تشيلهم 9 اشهر علشان تتحمل الالم ليه مااختارش ادم تانى تفتكر ايه الحكمه ايه الرساله اللى ممكن تتقال حوا هيا العقل هيا القوه هى انيس ادم وضلعه الاساسى ولكن ادم يا خساره مش فاهم ودايما الاساءه من الراجل للمراه اللى هى امى وامك وحوا ام كل البشر

Hazem Sobhi يقول...

داخل كل انسان جزء منه يوحى اليه انه ملهم و انه يوحى اليه. و هناك من يقرأ كتاب او بعض الاراء العابرة لبعض الصفاصطة و لن اقول الفلاسفة و يعتقد فيها. و كما قال حامد الغزالى الجهل انواع فمنه جهل الحماقة و هو ان يتعلم الانسان كلمتان لكى يقوم بنقد او مجادلة و هذا النوع من الجهل ليس له علاج - للمراجعة -كتاب ايها الولد-.

يا وائل هناك نساء لو حاولت ان تصل الى تفكيرهم و حنكتهم سيتطلب منك هذا هبه من الله. انا معك ان فى هذا الزمان اغلبهم فارغون.

و لكن انظر الى الشباب. فمنهم من اغلق على نفسه و جعل من النت ملجأ و انعزل عن الناس من قال محدش فاهمنى يعنى ان هو الى مش فاهم you are the variable and they are the constant my friend. و منهم من اصبح يلهث وراء المخدرات و منهم من اصبح يتمنى ان يكون مغنيا او لاعب كرة ...........الخ

يا صديقى اقسم بالله المشكلة مشكلة امة و ليس مشكلة رجل او امرأة

you are good and you think, and i like that if you wanna a contact my name is hazem, my mail is hazemsobhi@hotmail.com
hope for online talk once

اذا تريد بعض القرآت فى الفترة القادمة انصحك. هتفيدك و متأكد هتعجبك

Read fahrenhiet 451 - Ray broudbary
1984 - George Orwal
to understand what i mean

غير معرف يقول...

بجد أن رائع وتصوراتك أروع بكتير مما تخيلتــه
نعم عزيزي وائل عمر المرأة عالم لم يعرفه الرجل بعــد وبحر،لم يفكر وأن حدث أن يغوص أو حتى بقدميه..!!
عبني كثيراً كل تصوراتكِ،عندما فكرت في اختراع الفانلة ..!!
ومن هنا دعني عزيزي وائل اوضح أو اجلعه سؤال كما يحلو لك أو كما يصل إليك أن كنت نائما على سرير رملي أو على سرير حديد من بتاع زمان " عارفــة "ما أروعــة وما أروع الأنوثه التي كانت تزينــه نرجع لموضوعنا..!!علشان ما اشتتكش معايا؟
لكل رجل ميوله والجوانب التي يركز عليها في إعجابه بالمرأة، ولكن يجتمع معظم الرجال على عدة نقاط يجب أن تتوفر في كل امرأة حتى تبدو أنثى بكل ما للكلمة من معنى... فمن هذه الأمور يقـول الرجل أريدها ضعـيفة معي قـوية مع الآخرين. هذه هي الأنثى،الحقـيقـية في نظـــر الرجــل،والرجـل يسـتطيع مساعــدة المرأة على الاحتفاظ بهذه الأنوثة بأن يحترم ضعـف المرأة معه ،عندما يريدها ضعيفة ..!!فهمني طبعاً.
ورجل ليس طبعاً بخبرته في الستات ..!
ولكن لكامل عقلة وانت عارف الباقي يستطيع أن يربي فن الأنوثه في المرأة.
والرجل يستطيع بذكائه أن يعـلم زوجـته هـذا الفـن .. فـبعـض الرجال يتقن هذا الفـن.. وبعـض الرجال يدفع المرأة إلى أن تتخـلى عـن أنوثـتها وضعـفها وتتمرد عـلى الرجل لأنه استغـل حبها وضعـفها وأهانها بدلاً من أن يثني عـليها .. هنا بعـض النساء يتغـيرن إلى النقيض.
تماما كما قلت لمن اخترع الكعب العالي لهن،أراد فقد أن يرىَ الأنوثه ولو كاذبة دون أن يفكر في اختراع شيء يعلمهن فن الأنوثه،حتى يستطيع الرجل أن يتفنن في انوثة المرأة...!!
ومن يجهل المرأة،جهل كل شيء من حولــه
تحياتي وائل.
واعتذر على الأطاله عزيزي

دكتور سامح